Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 194 Hüküm no: 205 Orijinal metin no: [40b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Vasil’in oğlu Dimo’nun miras hissesini kardeşleri Nano ve Beto’ya sattığı Vilâyet-i Rumeli’nde Arnavud Belgradı kazâsına tâbi‘ Praştan nâm karye sâkinlerinden iken bundan akdem hâlik olan Vasil nâm zimmînin verâseti sulbî kebîr oğulları Dimo ve Nano nâm zimmîler ile sulbiye kebîre kızları Konduşa ve Despina nâm nasrâniyelere münhasıra olduğu şer‘an zâhir ve müte‘ayyin oldukdan sonra merkūm Dimo meclis-i şer‘-i şerîf-i lâzımü’t-tevkīrde işbu râfi‘ü’l-vesîka mersûm Nano kendi tarafından asâleten ve karındaşı mezbûr Beto tarafından ikrâr-ı âti’z-zikri tasdîke vekîl-i şer‘îsi olup vekâleten muvâcehesinde bi tav‘ihî ikrâr ve i‘tirâf edip babamız hâlik-i mezbûrun metrûkâtından olup karye-i mezbûrede vâki‘ bir tarafdan vâdi ve bir tarafdan Vasil mülkü ve bir tarafdan Kosta v. Topal mülkü ve bir tarafdan tarîk-i âm ile mahdûd bir bâb tahtânî odayı ve bir kıt‘a harman yerini ve bir kıt‘a samanlığı müştemil mülk menzilden ve yine karye-i mezbûrede vâki‘ hudûdu beynimizde ma‘lûm iki kıt‘a bağ ile bir kıt‘a bahçeden ve sâir babamız hâlik-i merkūmdan intikāl edip beynimizde ma‘lûm emlâkdan sekiz sehimden iki sehim hisse-i şâyi‘a-i mevrûsemi mezbûrân Nano ve Beto’ya iki bin sekiz yüz cedîd akçeye bey‘-i kat‘î ile [bey‘] edip onlar dahi ber vech-i iştirâk kabûl eyleyip semen-i mârrü’z-zikri merkūmân yedlerinden tamâmen ahz ü kabz eylediğimden sonra emlâk-i mersûmeden hisse-i mezbûremi mahallinde zabt ve tasarrufa mezbûrân Nano ve Beto’yu tarafımdan taslît eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fî gurreti Zilhicce li sene hamsin ve sittîn ve elf. Şuhûdü’l-hâl: Ali b. Mustafa, Dilâver b. Abdullah, Abdullah b. İskender, Hüseyin b. Ali Nano, Miho, Dimo, Yani, Viyokoşa, Dimo, Kiko, Dimo, Kosta, Bezko