Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 273 Hüküm no: 297 Orijinal metin no: [38b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. İbrahim’in evini vakıf mütevellisi Mesud Çelebi’ye istiğlâl yoluyla sattığı Mahmiye-i İstanbul’da Bahçekapısı dâhilinde Elvanzâde mahallesinde sâkin Mehmed Çelebi b. İbrahim nâm kimesne mahfil-i kazâda mahmiye-i mezbûrede Kanber Ağa nâm sâhibü’l-hayrın evkāfına hâlâ mütevellî olan bâ‘isü’l-kitâb Mesud Çelebi b. ( ) nâm kimesne tarafından husûs-ı âti’l-beyânı tasdîka sâbitü’l-vekâle vekîli olan Muharrem Çelebi b. Himmet nâm kimesne mahzarında ikrâr ve takrîr-i kelâm edip mahalle-i mezbûrede vâki‘ bir tarafı cidâr-ı hısn ve bir tarafı tarîk-i âm ve bir tarafı Ahmed Efendi menzili ve bir tarafı Sâlih Çelebi menzili ile mahdûd olan mülk menzilimi bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık mütevellî-i merkūm Mesud Çelebi’ye bi tarîki’l-istiğlâl yüz esedî guruşa bey‘ ve teslîm ol dahi mâl-ı vakf-ı mezbûr ile iştirâ ve kabûl ve kabz ve tesellüm eyledikden sonra yine menzil-i mahdûd-ı mezbûru ba‘de’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan bir sene tamâmına dek vech-i şer‘î üzre bana mütevellî-i merkūm Mesud Çelebi on beş esedî guruşa îcâr ve teslîm ben dahi vech-i muharrer üzre istîcâr ve kabûl ve tesellüm eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Hurrire fi’l-yevmi’l-hâmis ve’l-ışrîn min Cumâdelâhire li sene seb‘a ve seb‘în ve elf. Şuhûdü’l-hâl: Hasan Efendi el-Müezzin, Mahmud Çelebi, Mehmed Efendi, Şaban Efendi ve gayruhüm.