Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 273 Hüküm no: 298 Orijinal metin no: [38b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen ve vârisi olmayan Nefise Hatun’un bahçesinin rikâbdar Hasan Ağa’ya padişah tarafından temlik edilmesi Harem-i hümâyûn-ı sa‘âdet-makrûnda vâki‘ Hâs odada hâlâ rikâbdârlık şerefiyle şeref-yâb olan umdetü’l-emâcid ve’l-ekârim zübdetü’l-e‘âzım ve’l-efâhim zü’l-kadri’r-refî‘ ve’l-câhi’l-menî‘ Hasan Ağa tarafından husûs-ı âti’z-zikre vekîl olup bimâ hüve nehcü’s-sübût şer‘an vekâleti sâbite olan helvacı İvaz Bey b. Mustafa meclis-i şer‘-i şerîf-i Ahmedî ve mahfil-i dîn-i münîf-i Muhammedî’de takrîr-i kelâm ve ta‘bîr ani’l-merâm edip mahmiye-i İstanbul’da Kefeli mahallesinde vâki‘ bir tarafdan mahalle-i mezkûre imâmı menzili ve bir tarafdan Boğdan beyi sarayı ve iki tarafdan tarîk-i âm ile mahdûd dâhiliyyesi iki bâb fevkānî oda ve bir sagīr oda ve bir sofa ve dehliz ve altında bir matbah ve mahtab ve bir dolap kuyusu ve havuz ve zât-ı eşcâr-ı müsmireyi müştemil hadîka ve hâriciyyesi sokak kapısı kurbunda bir bâb sagīr bahçıvan odası ve zât-ı eşcâr-ı müsmire ve gayr-ı müsmire hadîka ve bir battal kapı ve tarîk-i âm tarafında üç bâb dükkân ve taraf-ı selâsesi taş duvarı müştemil mülk bahçenin mâlikesi olup bundan akdem vefât eden merhûme Nefise Hâtun’un vâris-i ma‘rûfu olmayıp cümle terekesi taraf-ı mîrîye âid olmağla bahçe-i mahdûde-i mezkûre hatt-ı hümâyûn izzet-makrûn ile taraf-ı şehriyârîden mûmâ-ileyh Hasan Ağa’ya ihsân ve temlîk olunmağın mârrü’z-zikr bahçenin taraf-ı şer‘den üzerine varılıp ba‘de’l-keşf arsası mesâha olunması matlûbumdur dedikde kıbel-i şer‘-i enverden mevlânâ Mehmed Efendi b. Abdülbâkī irsâl olunup ol dahi hâssa mi‘mârlardan üstâd Ali Halîfe b. Abdullah ve Hüseyin b. Abdullah ve zeyl-i rakīmde muharrerü’l-esâmî olan müslimîn ile bahçe-i mahdûd-ı mezbûrenin üzerine varıp ba‘de’l-keşf mi‘mârân-ı mezkûrân evvelâ zikr olunan dâhiliyyenin arsasını mesâha eylediklerinde tûlen ve arzen bi hesâb-ı terbî‘î sekiz yüz kırk üç zirâ‘ olup ba‘dehû hâriciyyenin arsasını mesâha ettiklerinde tûlen ve arzen bi hesâb-ı merkūm beş bin dört yüz on altı zirâ‘ olup cem‘an hudûd-ı mezkûre ile mahdûd olan bahçenin arsası bi hesâb-ı merkūm altı bin iki yüz elli dokuz zirâ‘ olmağın vâki‘ hâli mevlânâ-yı mersûm mahallinde tahrîr ba‘dehû ma‘an irsâl olunan Halil b. Mehmed ile meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâlis ve’l-ışrîn min Cumâdelâhire li sene seb‘a ve seb‘în ve elf. Şuhûdü’l-hâl: Fahrü’l-akrân Hüseyin Ağa b. Abdullah, Hacı Hüseyin b. Abdullah, Abdünnebi Halîfe b. Hasan el-Müezzin, Hasan b. Hacı Mehmed, Mehmed b. Mustafa, Mehmed b. Mirza, Musli b. Hasan, Ahmed b. Muharrem, Ali b. Abdullah.