Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 199 Hüküm no: 211 Orijinal metin no: [42a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pandazi v. Angeli’nin ölen annesi Dimitro’ya ait olduğu iddiasıyla talep ettiği ineğin üvey babası Angeli v. Todori’nin mülkü olduğu Havâss-ı aliyye kazâsına tâbi‘ Cuhûd Burgos demekle ma‘rûfe karyede sâkin Pandazi v. Angeli nâm zimmî meclis-i şer‘-i şerîf-i lâzımü’t-tevkīrde üvey babası râfi‘ü’l-vesîka Angeli v. Todori nâm zimmî muvâcehesinde üzerine takrîr-i da‘vâ edip mezbûr Angeli bundan akdem hâlike olan anam Dimitro’ya bir re’s kara sığır ineği hibe ve teslîm ol dahi hâl-i hayâtında ittihâb ve tesellüm ve kabûl etmiş iken hâlen merkūm Angeli mârrü’z-zikr ineği mülkü olmak üzre vaz‘-ı yed murâd eder suâl olunup mîrâsa idhâle tenbîh olunmak matlûbumdur dedikde gıbbe’s-suâl mersûm Angeli cevâbında fi’l-vâki‘ zikr olunan inek kendi mülkümdür deyû ikrâr lâkin vech-i muharrer üzre hibe ve teslîm etmedim deyû hâlike-i merkūmeye hibe eylediğini münkir olıcak müdde‘î-i mezbûr Pandazi’den takrîrine mutâbık beyyine taleb olundukda isbât-ı beyyineden izhâr-ı acz edip istihlâf etmeğin fi’l-hakīka sâlifü’z-zikr ineği hâlike-i mersûmeye hâl-i hayâtında minvâl-i mübeyyen üzre hibe ve teslîm eylemediğine mezbûr Angeli’ye yemîn teklîf olundukda ol dahi alâ vefki’l-mes’ûl yemîn billâhi’llezî enzele’l-İncîle alâ İsâ -a.s.- etmeğin mûcebiyle merkūm Pandazi bî-vech mu‘ârazadan men‘ birle mâ hüve’l-vâki‘ bi’t-taleb ketb olundu. Fi’l-yevmi’s-sâdis min Zilhicceti’ş-şerîfe min şuhûri sene hamsin ve sittîn ve elf. Şuhûdü’l-hâl: Ali b. Mustafa, Abdullah b. İskender, Dilâver b. Abdullah, Hüseyin b. Ali, Ali b. Veli, Rizo v. Niko, Ergiri v. Dimo, Todori v. Mihal ve gayr