Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 199 Hüküm no: 212 Orijinal metin no: [42a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bitişiğindeki bostanın mutasarrıfı Çavuşzâde Mehmed Efendi’nin avlu duvarı yıkılıp Ahmed Ağa’nın mülk bahçesine girdiği ve durumun keşfi Mahrûse-i Galata’da vâki‘ Mevlevîhâne kurbunda Müeyyedzâde mahallesi sâkinlerinden bâ‘is-i hâze’l-kitâb fahrü’l-akrân Ahmed Ağa b. Abdurrahman nâm kimesnenin sulbî kebîr oğlu ve tarafından husûs-ı âti’z-zikre vekîl-i sâbitü’l-vekâlesi umdetü’l-eşbâh Osman Çelebi nâm kimesne meclis-i şerî’at-i şerîfede bi’l-vekâle takrîr-i kelâm edip baba[m] müvekkilim mezbûr Ahmed Ağa’nın Havâss-ı aliyye kazâsına tâbi‘ Alibeyköyü demekle ma‘rûfe karyede mülk çiftliği olmağla çiftlik-i mezbû[r] hizâsında ma‘lûmü’l-hudûd bir kıt‘a mülk bahçesi olup ol bahçeye muttasıl Çavuşzâde demekle şehîr Mehmed Efendi b. Mustafa nâm kimesnenin taht-ı tasarrufunda ma‘lûmü’l-hudûd ve’l-cevânib bir kıt‘a bostan olmağla babam müvekkil-i mezbûrun mülkü olan bahçenin cânib-i şarkīsinde olan tahta havlu mürûr-ı eyyâm ile münhedim olup mezbûr Mehmed Efendi bahçe-i merkūmenin münhedim olan mevzi‘den bir-iki eşcârına ve birkaç zirâ‘ arsasına dahl edip ta‘arruzdan hâlî değildir yedimde olan buyruldu-yı şerîf mûcebince üzerine varılıp ba‘de’l-müşâhede men‘ ve def‘ olunmak murâdımdır deyû yedinde olan buyruldu-yı şerîfe nazar olundukda Mi‘mâr Ağa ve Nâib Efendi şer‘le görüle deyû buyrulmağın imtisâlen leh savb-ı şer‘-i kavîmden fahrü’l-kuzât Mevlânâ Mehmed Efendi b. Nasuh irsâl olunup ol dahi hâssa mi‘mârlarından Üstâd Mehmed b. Abdullah ve Hüseyin Beşe b. Mehmed ve zeyl-i vesîkada muharrerü’l-esâmî olan bî-garaz müslimîn ile zikr olunan bahçeye varıp mezbûr Mehmed Efendi mahzarında a[k]d-i meclis edip mi‘mârân-ı mezbûrân mûmâ-ileyh Çavuşzâde Mehmed Efendi muvâcehesinde müvekkil-i mezbûr Ahmed Ağa bahçesinin münhedim olan mevzi‘in vâdi tarafında olan taş duvardan tarîk-i âm tarafında olan taş duvar peresesine varınca mesâha eyledikde bir kızılcık ve iki sagīr dut ve iki sagīr unnâb ve iki ayva ve bir kara ağaç ile bir ceviz ve bir erik eşcârı müvekkil-i mezbûr Ahmed Ağa’nın mülkü olan bahçenin hudûdu dâhilinde olup ve bir kebîr dut ağacı ile iki kebîr ve bir sagīr kara ağaç eşcârı mezbûr Mehmed Efendi tasarrufunda olan bostan hudûdu dâhilinde olduğun mi‘mârân-ı mezbûrân ve sâir ehl-i vukūf mu‘âyene ve müşâhede eylediklerinden sonra her biri kendi hudûdu dâhilinde olan eşcârı rızâlarıyla kabz ve alâmet-i fâsıla eylediklerinden sonra vâki‘ hâli Mevlânâ-yı mezbûr mahallinde tahrîr ba‘dehû gelip meclis-i şer‘de alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’r-râbi‘ min Zilhicceti’ş-şerîfe li sene hamsin ve sittîn ve elf. Şuhûdü’l-hâl: Salih Çelebi b. Mustafa, Yahya Bey b. Abdullah, Mehmed Çavuş b. Himmet, Ali Beşe b. Mehmed er-Râcil, Abdi Bey b. Mustafa, Mehmed Beşe b. İbrahim