Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 200 Hüküm no: 213 Orijinal metin no: [42b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Çelebi ile kız kardeşi Âişe’ye ait menzille harman yerinin Hasan Beşe’ye satıldığı, Ahmed Çelebi’nin tasarrufundaki vakıf tarlaların da devredildiği Mahrûse-i Kostantıniyye’de Karagümrük kurbunda Karabaş mahallesi sükkânından Ahmed Çelebi b. Halil nâm şâb kendi tarafından asâleten ve li ebeveyn kız karındaşı Âişe nâm hâtun tarafından câ’î menzil ve harman yerinde olan sülüs hisse-i şer‘iyyesini bey‘a vekîl olup mezbûrenin zâtını ma‘rifet-i şer‘iyye ile ârifân olan Ahmed Çelebi b. Abdülmennân ve diğer Ahmed Beşe b. Derviş er-Râcil şehâdetleriyle şer‘an vekâleti sâbite oldukdan sonra vekâleten meclis-i şer‘-i şerîf-i enver ve mahfil-i dîn-i münîf-i ezherde yine mahrûse-i merkūme mahallâtından Kasab İlyas mahallesi sâkinlerinden işbu sâhibü’l-kitâb Hasan Beşe b. Abdullah nâm râcil mahzarında bi’l-asâle ve bi’l-vekâle ikrâr ve i‘tirâf edip silk-i mülkümüzde münselik olup Havâss-ı aliyye kazâsı nevâhîsinden Çekmece-i suğrâ nâhiyesine tâbi‘ Anbarlı nâm karyede vâki‘ bir tarafdan Abdurrahman Çelebi mülkü ve bir tarafdan vâdi ve bir tarafdan Çorbacı kızları mülkü ve bir tarafdan tarîk-i âm ile mahdûd bir fevkānî ve bir tahtânî iki bâb odaları ve bir su kuyusunu ve zât-ı eşcâr-ı müsmire ve gayr-ı müsmire bahçeyi müştemil mülk menzilimizi cemî‘ tevâbi‘iyle ve me[n]zil-i mezbûra muttasıl bir kıt‘a harman yerimizi mezbûr Hasan Beşe’ye yetmiş buçuk kıt‘a riyâlî kebîr guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i meşrûh üzre iştirâ ve tesellüm ve kabz ve kabûl eyledikden sonra hâlen benim taht-ı tasarrufumda olan merhûm ve mağfûrun-leh Sultan Bayezid Hân -aleyhi’r-rahmetü ve’r-rıdvân- hazretlerinin evkāf arâzisinden karye-i merkūme sınırı dâhilinde mevâzi‘-i müteferrikada vâki‘ her birinin hudûdu beynimizde ma‘lûm tahmînen on beş keyl tohum istî‘âb eder sekiz kıt‘a tarlalarımın hakk-ı tasarrufların evkāf-ı mezbûr mütevellîsi ma‘rifetiyle mezbûr Hasan Beşe’ye yirmi iki buçuk kıt‘a riyâlî guruşa tefvîz ve ferağ eylediğimde ol dahi vech-i muharrer üzre tefevvuz ve kabûl eyledikden sonra semen-i mezbûr ile bedel-i merkūm ki cem‘an doksan üç kıt‘a riyâlî guruşu mezbûr Hasan Beşe yedinden asâlet ve vekâletim hasebiyle tamâmen ahz ü kabz eyledim ba‘de’l-yevm menzil-i mezbûr ile harman yeri merkūm Hasan Beşe’nin mülk-i müşterâsıdır, keyfemâ yeşâ ve hasbemâ yehtâr mutasarrıf olsun dedikde ve tarlalar dahi dâhil-i taht-ı tasarrufu olmuşdur emsâli tasarrufu gibi mutasarrıf olsun dedikde mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min Zilhicceti’ş-şerîfe li sene hamsin ve sittîn ve elf. Şuhûdü’l-hâl: Ali Bey b. Hasan el-Cündî, Ahmed Beşe b. Derviş, Halil Beşe b. Habib, Ali Beşe b. Abdullah, Hüseyin Beşe b. Ali, Küçük Ali Dede b. Abdullah