Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 201 Hüküm no: 214 Orijinal metin no: [42b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rabia bt. Mehmed ile zevci Mehmed Beşe b. Ahmed’in muhâlaa ile boşandıkları Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Kasım Paşa mahallesi sâkinelerinden sin ve cüssesinin bülûğa tahammülü olan Râbia bt. Mehmed nâm mürâhıka meclis-i şer‘-i şerîf-i lâzımü’t-tevkīrde zevci işbu râfi‘ü’l-kitâb Mehmed Beşe b. Ahmed nâm şâbb-ı râcil mahzarında bi tav‘ihâ ikrâr ve i‘tirâf edip zevcim mezbûr Mehmed Beşe ile hüsn-i zindegânemiz olmamağla beynimizde şikāk-ı küllî vâki‘ olmağın zimmetinde mütekarrir olan dört bin cedîd akçe mehr-i müeccelimden geçip ve nafaka-i iddet ve me’ûnet-i süknâm kendi üzerime olmak üzre mezbûr Mehmed Beşe ile muhâla‘a-i sahîha-i şer‘iyye ile muhâla‘a eyleyip zevciyete ve beynimizde ma‘lûm bir kırmızı sof ferâceye ve bir mükemmel hamam rahtına ve bir sadef aynaya ve üç taşlı bir sîm hâteme müte‘allik âmme-i da‘vâdan mezbûr Mehmed Beşe’nin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde mezkûr Mehmed Beşe dahi minvâl-i meşrûh üzre olan hul‘u kabûl edip merkūm Râbia’nın zimmetini zevciyete müte‘allik cemî‘ de‘âvî ve mütâlebât ve eymân ve muhâsamâtdan ibrâ ve iskāt eyledim dedikde ahadühümâ âharın vech-i mübeyyen üzre cârî olan kelimâtını vicâhen tasdîk ve şifâhen tahkīk etmeğin mâ hüve’l-vâki‘ bi’l-ibtigā ketb olundu. Fi’l-yevmi’s-sâbi‘ min Zilhicceti’ş-şerîfe min şuhûri sene hamsin ve sittîn ve elf. Şuhûdü’l-hâl: Ali Çelebi b. Handan, Ahmed Çelebi b. Mehmed, Mehmed Efendi b. Habil el-Kadı, Yusuf Bey b. Abdullah, Abdullah Beşe b. İskender ve gayruhüm Beyaz