Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 202 Hüküm no: 215 Orijinal metin no: [43a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bâli v. Avanos’un Bostanzâde Mehmed Efendi’nin ölen babası Mehmed Efendi’de kalan alacağı hususunda sulh olduğu Mahmiye-i İstanbul hısn-ı ebvâbından Balat kapısı dâhilinde vâki‘ Yazıcı mahallesi sâkinlerinden olup horasancı tâ’ifesinden Bâli v. Avanos nâm Ermeni meclis-i şer‘-i şerîf-i lâzımü’t-teşrîfde işbu sâhibü’l-kitâbi’l-müstetâb umdetü’l-ulemâ’i’l-izâm zübdetü’l-fuzalâ’i’l-fihâm câmi‘u’l-fürû‘ ve’l-usûl hâvi’l-menkūl ve’l-ma‘kūl Bostanzâde Mehmed Efendi necl-i el-müvellâ el-merhûm Mehmed Efendi hazretleri taraf-ı şerîflerinden husûs-ı câ’i’z-zikri tasdîke vekîlleri olup hasm-ı şer‘î-i câhid mahzarında Yusuf Efendi b. Ebîbekir ve Mehmed Efendi b. Mahmud şehâdetleri ile şer‘an vekâleti sâbite olan mefharü kuzâti’l-İslâm Ömer Efendi b. Receb nâm kimesne muvâcehesinde ikrâr-ı tâm ve takrîr-i kelâm edip müvekkil-i müşârun-ileyh Mehmed Efendi hazretlerinin vâlid-i mâcidleri merhûm-ı mûmâ-ileyh Mehmed Efendi zimmetinde mikdârı beynimizde ma‘lûm yedimden müşterâ ve makbûz kireç ve horasan semeninden seksen yedi kıt‘a riyâlî guruş-ı kebîr hakkım olup meblağ-ı mezbûru kable’l-edâ fevt olmağla zimmetlerinde kalmışidi hâlen meblağ-ı mezbûru muhallefât-ı vâfiyesinden taleb eylediğimde beynimizde münâza‘ât-ı kesîre cereyân ettikden sonra vesâtat-i muslihîn ile makbûz-ı mezbûrdan beni yeşil çuka kaplı bir zerdave kürk üzerine sulh eylediklerinde ben dahi sulh-ı mezbûru kabûl ve bedel-i sulh olan mezbûru müvekkil-i müşârun-ileyh hazretleri yedinden tamâmen ahz ü kabz edip husûs-ı mezbûra müte‘allik cemî‘ da‘vâ ve mütâlebât ve eymân [ve] muhâsamâtdan müvekkil-i mûmâ-ileyh Mehmed Efendi hazretlerinin zimmetlerini ibrâ-i âmm-ı kātı‘ü’n-nizâ‘la ibrâ ve iskāt eyledim ba‘de’l-yevm da‘vâ ve nizâ‘ım yokdur sudûr dahi ederse lede’l-hükkâm mesmû‘a ve makbûle olmaya dedikde gıbbe’t-tasdîki’l-vicâhî mâ vaka‘a bi’t-taleb ketb olundu. Fi’l-yevmi’t-tâsi‘ min Zilhicceti’ş-şerîfe li sene hamsin ve sittîn ve elf. Şuhûdü’l-hâl: İbrahim Efendi el-İmâm, Ahmed Çelebi b. Mehmed el-Müderris, Ahmed Çelebi b. Yakub, Mehmed Çelebi b. İbrahim, Osman Bey b. Mehmed, Mustafa Bey b. Mehmed, Mehmed Bey b. Mustafa, Ali Beşe b. Mustafa, Mustafa b. Mehmed, Hasan Beşe b. Ali, Bayram Sofu b. Mehmed, Abdi b. İskender ve gayr