Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 203 Hüküm no: 216 Orijinal metin no: [43a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Piyâle Beşe’nin Ali b. Abdülbâki’ye tüfekle vurup yaraladığı Da‘vâ-yı âtiyetü’z-zikrin mahallinde istimâ‘ olunması için buyruldu-yı şerîf vârid olmağın imtisâlen leh kıbel-i şer‘-i şerîfden umdetü’l-müderrisîn Mevlânâ Ahmed Efendi irsâl olunup ol dahi zeyl-i kitâbda mastûretü’l-esâmî müslimîn ile Havâss-ı Kostantıniyye -hamâha’llâhu te‘âlâ ani’l-beliyye- kazâsı ihtivâsından Terkos nâhiyesine tâbi‘ Filiboz nâm karyeye varıp akd-i meclis-i şer‘-i şerîf eyledikde karye-i merkūme sâkinlerinden işbu râfi‘ü’l-vesîka Ali b. Abdülbâkī nâm kimesne meclis-i makūd-ı merkūmda Piyâle Beşe b. Abdullah nâm râcil mahzarında üzerine da‘vâ ve takrîr-i kelâm edip mezbûr Piyâle Beşe târih-i kitâbdan bir gün mukaddem ben kendi hâlimde dururken üzerime gelip tüfek ile sol memem altına bi gayr-ı hak urup beni mecrûh eylemişdir, suâl olunup mûceb[i] icrâ olunmak matlûbumdur dedikde gıbbe’s-suâl ve akībe’l-inkâr müdde‘î-i merkūm Ali’den da‘vâsına muvâfık beyyine taleb olundukda udûl-i ricâlden olup mahmiye-i İstanbul’da Kaliçeci mahallesi sâkinlerinden fahrü’l-akrân Salih Bey b. Yusuf ve İdris Beşe b. Abdülmennân ve yine mahmiye-i merkūmeden el-Hâc Ali mahallesi sükkânından Ali Çelebi b. Ahmed nâm kimesneler li ecli’ş-şehâde meclis-i mezkûrda hâzırûn olup istişhâd olunduklarında fi’l-vâki‘ müdde‘î-i mezbûr târih-i kitâbdan bir gün mukaddem karye-i mezbûrede kendi hâlinde dururken mersûm Piyâle Beşe üzerine gelip tüfek ile sol memesi altına bizim huzûrumuzda urup merkūm Ali’yi mecrûh etmişdir, biz bu husûsa vech-i meşrûh üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri hayyiz-i kabûlde vâki‘a oldukdan sonra Mevlânâ-yı müşârun-ileyh husûs-ı merkūmu mahallinde istimâ‘ ve tahrîr ba‘dehû meclis-i şer‘-i şerîfe gelip alâ vukū‘ihî inhâ ve takrîr etmeğin mâ hüve’l-vâki‘ gıbbe’t-taleb ve’l-iltimâs ketb ve sebt olundu. Fî 25 min Zilka‘deti’ş-şerîfe li sene 1065. Şuhûdü’l-hâl: El-Hâc Mahmud Beşe b. Mustafa çukadâr, Veli Bey b. İskender, Hüseyin Beşe b. Ali, Ömer Çelebi b. Hüdâverdi, Mustafa Beşe b. Mehmed