Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 204 Hüküm no: 217 Orijinal metin no: [43b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Dimitri’nin cizyesinin oğlundan talep edilemeyeceği Havâss-ı aliyye kazâsına tâbi‘ Çekmece-i suğrâ muzâfâtından Büyük Halkalı nâm karye ahâlîsinden Ortoz v. Maskulyo ve Velabat v. Yo[r]gi ve Tanaş v. Yani nâm zimmîler ve sâir ahâlî-i karye-i merkūme meclis-i şer‘-i şerîf-i lâzımü’t-tevkīrde işbu hâmilü’l-vesîka Dimitri v. Korteş nâm nasrânî muvâcehesinde her biri üzerine da‘vâ ve takrîr-i kelâm edip mezbûr Dimitri’nin babası olup bundan akdem hâlik olan merkūm Korteş nâm zimmînin helâki gününden târih-i kitâba gelince iki sene olmağla beher sene beş yüz akçeden iki senede zimmetine lâzım gelen iki bin akçe harâcını cem‘a me’mûr olanlar bizden mukaddemâ almışidi, hâlen biz dahi oğlu merkūm Dimitri yedinden taleb eylediğimizde edâdan imtinâ‘ eder suâl olunup alıverilmesi matlûbumuzdur dediklerinde gıbbe’s-suâl mezbûr Dimitri cevâbında fi’l-hakīka babam hâlik-i merkūm hâl-i hayâtında zimmetine lâzım gelen harâc ve cizyesini edâ ederdi, lâkin helâkinden sonra lâzım gelmemeğin edâdan imtinâ‘ ederin deyû hâlen Şeyhülislâm müfti’l-enâm sellemehü’s-selâm hazretlerinden yedlerinde olan fetvâ-yı şerîfi ibrâz edip ve ahâlî-i karye-i mezbûre muvâcehelerinde feth ve kırâ’at olundukda Zeyd-i zimmî fevt oldukda cizye cem‘ine me’mûr olanlar Zeyd’in oğlu Amr’dan Zeyd için cizye almaya kādir olurlar mı deyû istiftâ olundukda cevâb-ı bâ-savâblarında olmaz deyû buyrulmağın ber mûceb-i fetvâ-yı şerîfe ahâlî-i karye-i merkūme bî-vech ta‘arruzdan men‘ birle mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ min Zilhicceti’ş-şerîfe li sene hamsin ve sittîn ve elf. Şuhûdü’l-hâl: Receb Efendi [b.] Abdi, Ali Beşe b. İskender, Abdullah Beşe b. İskender, Dilâver Beşe b. Abdullah, Hüseyin Çelebi b. Ali