Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 204 Hüküm no: 218 Orijinal metin no: [43b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Murad Beşe b. Mehmed’in mülk çiftliğini içindekilerle birlikte İbrahim Beşe b. Mehmed’e sattığı ve çiftliğe bağlı çayır, bostan ve on yedi tarlanın tasarruf hakkını devrettiği Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de merhûm Otakçıbaşı mahallesi sâkinlerinden fahrü’l-eşbâh Murad Beşe b. Mehmed nâm râcil meclis-i şer‘-i şerîf-i lâzımü’t-tevkīrde işbu râfi‘ü’l-kitâb fahrü’l-emâsil ve’l-akrân İbrahim Beşe b. Mehmed nâm kimesne mahzarında bi’t-tav‘ ve’r-rızâ ikrâr ve i‘tirâf edip silk-i mülkümde muntazam olup Havâss-ı Kostantıniyye -hamâha’llâhu te‘âlâ ani’l-beliyye- kazâsı nevâhîsinden Terkos nâhiyesine tâbi‘ Bedenhor demekle ma‘rûf karyede vâki‘ üç tarafdan Süleyman Ağa çayırı ve bir tarafdan tarîk-i âm ile mahdûd fevkānî ve tahtânî üç bâb odaları ve bir şehnişîni ve bir fırın ve bir samanlık ve bir su kuyusunu ve bir ahır yerin ve zât-ı eşcâr-ı müsmire ve gayr-ı müsmire bahçeyi müştemil olup çiftlik ta‘bîr olunur mülk menzilimi ve içinde mevcûd yetmiş keyl alef ve on keyl buğday ve sekiz çit saman ve tahmînen on araba otluğumu ve yine bir çift camus öküzü ile iki re’s camus ineği ve sagīr ve kebîr on re’s mevâşîmi ve bir araba ve âlât-ı zirâ‘at ve esvâb-ı hirâsetimi cümle tevâbi‘ ve levâhıkı ile müşârun-ileyh İbrahim Beşe’ye bi safkatin vâhidetin otuz dokuz bin ceyyid ve cedîd akçeye bey‘-i bâtt-ı sahîh-i şer‘î ile bey‘ ve teslîm ol dahi vech-i muharrer üzre iştirâ ve tesellüm ve kabz ve kabûl eyledikden sonra yine ol çiftliğe intimâ’ ile tahdîd ve tavsîfden müstağnî bir kıt‘a çayır ve bir kıt‘a bostan yeri ile on yedi kıt‘a tarlalarımı dahi müşârun-ileyh İbrahim Beşe’ye beş bin cedîd akçe bedele ma‘rifet-i sâhib-i arz ile tefvîz ve ferağ eylediğimde, ol dahi minvâl-i mübeyyen üzre tefevvuz ve kabûl eyledikden sonra semen-i mezbûr ile bedel-i merkūm cem‘an kırk dört bin cedîd akçeyi müşârun-ileyh İbrahim Beşe yedinden bi’t-tamâm ve’l-kemâl ahz ü kabz eyledim ba‘de’l-yevm benim alâka ve medhalim yokdur müşârun-ileyh İbrahim Beşe’nin mülk-i mahz-ı sarîhi olmuşdur keyfemâ yeşâ ve hasbemâ yehtâr mutasarrıf olsun dedikde gıbbe’t-tasdîki’ş-şer‘iyyi’l-vicâhî mâ hüve’l-vâki‘ bi’l-ibtigā ketb olundu. Fi’l-yevmi’s-sâdis aşer min Zilhicceti’ş-şerîfe li sene hamsin ve sittîn ve elf. Şuhûdü’l-hâl: Ahmed Efendi b. Mehmed el-İmâm, Ali Efendi b. Abdullah, Ahmed Çelebi b. Hasan el-Müezzin, Abdurrahman Efendi b. Abdülfettâh, Mehmed Çelebi b. ( ) el-Müezzin, Mehmed Efendi el-Hatîb, Ali Beşe b. Ramazan, Ramazan Beşe b. Mustafa, Osman Beşe b. Abdullah, Mustafa Halîfe b. Habib, Mustafa b. Mehmed, Hüseyin b. Abdullah, Mehmed b. Abdülbâkī ve gayruhüm mine’l-hâzırîn