Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 205 Hüküm no: 219 Orijinal metin no: [44a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Ağa b. Abdülbâki’nin âtıl durumdaki Yakub Ağa Vakfı’na ait çeşmenin suyollarını tamir ettirdiği, getirdiği suyun yeteri kadarının çeşmeden akıtılacağı, kalanının kendisine ait olduğu [Derkenâr] Hasan Ağa suyu hüccetidir. Dârü’l-hilâfeti’l-aliyye Kostantıniyyetü’l-mahmiyye’de merhûm Yakub Ağa Vakfı’na ve binâ eylediği çeşme vakfına hâlen mütevellî olan umdetü’l-ekârim Ali Ağa b. Abdürrahim meclis-i şer‘-i şerîf-i lâzımü’t-teşrîfde ikrâr-ı tâm edip merhûm mezbûr mahmiye-i merkūmede bir çeşme binâ ve on masura su vakf etmeğin cereyân edip müslimîn ve müslimât müntefi‘ler iken kırk sene mukaddem ol vakıf suyun yolları harâb olup ta‘mîr ve termîm için vakıf nukūdu olma[ma]ğla çeşme-i merkūm hâlî ve mu‘attal kalmışidi hâlen Saray-ı cedîd-i sultânîde hâs odada odabaşı olan iftihârü’l-emâcid ve’l-ekârim Hasan Ağa b. Abdülbâkī nâm sâhibü’l-hayrât ol çeşme suyunun yollarını ta‘mîr ve termîm edip ol çeşmeye kifâyet mikdârı verilip bâkī kalan su müşârun-ileyh Hasan Ağa’nın mülkü olup murâd eylediği mahalde icrâ etmek üzre beynimizde kavl etmişizdir, kıbel-i şer‘-i şerîfden üzerine varılıp erbâb-ı miyâh beynlerde mu‘tâd olan tarz-ı kadîm üzre vezn ve ayâr ve tahmîn ve ta‘yîn olunmak matlûbumuzdur dedikde savb-ı şer‘-i kavîmden umdetü’l-kuzât Mevlânâ Mehmed Efendi b. Nasuh irsâl olunup ol dahi hâssa suyolu nâzırı umdetü’l-a‘yân Ali Ağa b. Yunus ve râh-ı âbîler kethüdâsı el-Hâc Mehmed b. Mustafa ve yiğitbaşıları Veli Bey b. Ramazan ve el-Hâc İbrahim b. Sefer ve zeyl-i vesîka[da] mastûrü’l-esâmî müslimîn ile ol suyun mecrâsı olan Şâhin Deresi nâm mevzi‘e varıp keşf ve müşâhede olundukdan sonra erbâb-ı miyâh çeşme-i merkūme suyunun cümlesini beynlerde mu‘tâd olan tarz-ı ma‘rûf ve semt-i me’lûf üzre vezn ve ayâr eylediklerinde kâmilen on masura su cârî olup iki masurası mukaddemâ ilhâk olunan cennet-mekân firdevs-âşiyân Sultan Süleyman Hân hazretlerinin Güzelce Kemer demekle ma‘rûf suyuna hakk-ı mecrâ verilip bâkī sekiz masura suyun beş masurası müşârun-ileyh Hasan Ağa’nın ta‘mîri mukābelesinde mülkü olup murâd eylediği mahalden ifrâz edeler bâkī kalan üç masura zikr olunan çeşmeye kifâyet eder deyû alâ vechi’l-mu‘tâd vezn ve ayâr ve çeşme-i merkūmeye kâmil üç masura suyu ta‘yîn ve tahsîs ve bu minvâl üzre icmâ‘ ve ittifâk eylediklerin Mevlânâ-yı müşârun-ileyh mahallinde ketb ve terkīm ba‘dehû meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn min Zilka‘deti’ş-şerîfe li sene hamsin ve sittîn ve [elf] 65. Şuhûdü’l-hâl: Mehmed Efendi b. Mustafa, Musa Beşe b. Şaban, Osman Bey b. Aydın el-Cündî, Ali Bey b. Mustafa, Hasan Çelebi b. Ku[r]d [Derkenâr] Kaydı ihrâc olunmuşdur fî 29 R sene [1]287. <>