Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 274 Hüküm no: 299 Orijinal metin no: [38b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sulehâdan Mehmed Efendi’nin vakıf arsasına ev yapmasına izin verildiği Sâhibü’l-hayr vezneci Mustafa b. Hamza’nın mahmiye-i İstanbul’da Hatîb Muhyiddin mahallesinde vâki‘ musluğa su doldurmak üzre süknâsı sulehâ-yı müfessirînden bir recüle meşrûta vakfı olup mahalle-i mezbûrede vâki‘ bir tarafdan Mustafa Ağa mülkü ve bir tarafdan tarîk-i hâs ve iki tarafdan tarîk-i âm ile mahdûde menzil arsasının tevcîh-i hâkim ile ber mûceb-i şart-ı vâkıf mutasarrıfı olup sulehâ-yı müfessirînden olan bâ‘isü’l-kitâb Mehmed Efendi b. el-Hâc Mahmud meclis-i şer‘-i şerîf-i Ahmedî ve mahfil-i dîn-i münîf-i Muhammedî’de takrîr-i kelâm ve ta‘bîr ani’l-merâm edip arsa-i mezbûre üzerine binâya mevkūf bir nesne olmamağın vakf-ı mezbûr mütevellîsi olan Seyfullah nâm kimesne arsa-i mezbûre üzerine malım ile mülküm olmak üzre binâya bana izin verip ve yedime temessük dahi vermiş idi taraf-ı şer‘-i şerîfden dahi arsa-i mezbûre üzerine mülküm olmak üzre malım ile binâya izin verilmek matlûbumdur deyû mazmûnu takrîr-i meşrûhuna muvâfık mütevellî-i mezbûrun imzâ ve hatmini hâvî temessük ibrâz etmeğin mûmâ-ileyh Mehmed Efendi’ye arsa-i mezbûre üzerine malı ile mülkü olmak üzre binâya taraf-ı şer‘-i şerîfden izin verilmeğin mâ hüve’l-vâki‘ bi’t-taleb bi’l-ibtigā ketb olundu. Fi’l-yevmi’s-sânî ve’l-ışrîn min Cumâdelâhire li sene seb‘a ve seb‘în ve elf. Şuhûdü’l-hâl: Mefharü’l-kuzât İbrahim Efendi b. eş-Şeyh Hızır Efendi, fahrü’l-akrân Mehmed Çelebi b. Abdullah Kethüdâ-yı muhzırân, Şükrullah Bey b. Musli, Abdi Çelebi b. Hüseyin, İbrahim Çelebi b. Ahmed, Mehmed Bey b. Ramazan ve gayruhüm.