Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 206 Hüküm no: 220 Orijinal metin no: [44a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdurrahman Bey b. Halil’in değirmendeki hissesini Hüseyin Bey b. Mehmed’e sattığı Fi’l-asl vilâyet-i Anadolu’da Kastamonu sancağında Ginolu kazâsına tâbi‘ Sürdeke nâm karye ahâlîsinden olup hâlen Mısr-ı Kahire’de mütemekkin olan Abdurrahman Bey b. Halil nâm kimesne meclis-i şerî’at-i şerîfede işbu râfi‘ü’l-kitâb Hüseyin Bey b. Mehmed nâm cündî muvâcehesinde tav‘an ikrâr ve i‘tirâf edip emlâkimden olup karye-i merkūmede vâki‘ Köpekli Değirmeni demekle ma‘rûf değirmenden otuz günde altı gün mülk hisse-i şâyi‘amı müşârun-ileyh Hüseyin Bey’e cedîd bin akçeye bey‘-i kat‘î ile bâtten bey‘ eylediğimde ol dahi vech-i mübeyyen üzre hisse-i ma‘lûmeyi iştirâ ve kabûl eyleyip semeni olan meblağ-ı mezbûr bin akçeyi müşterî-i merkūm Hüseyin Bey yedinden tamâmen ahz ü kabz eylediğimden sonra hisse-i ma‘hûde-i ma‘lûmeyi mahallinde ahz ü kabz ve zabt ve tasarrufa müşterî-i merkūm Hüseyin Bey’i taslît eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin aşer min Zilhicceti’ş-şerîfe li sene hamsin ve sittîn ve elf min hicreti men lehü’l-izzu ve’ş-şeref. Şuhûdü’l-hâl: Abdurrahman Efendi b. Ömer el-Hatîb, Ömer Bey b. Yusuf, Sencar b. Bazarlı, Hüseyin b. İvaz, Hüseyin b. Mustafa, Davud b. Veli, Mustafa Beşe b. Müyesser, Mustafa b. Mehmed, Hüseyin Beşe b. Ali ve gayr