Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 207 Hüküm no: 221 Orijinal metin no: [44b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bedahşân Hâtun bt. Abdullah’ın çiftliğini içindekilerle birlikte İbrahim Beşe’ye sattığı Havâss-ı aliyye -hamâha’llâhu te‘âlâ ani’l-beliyye- kazâsına tâbi‘ Alibeyköyü denmekle ma‘rûfe karye sâkinelerinden umdetü’l-muhadderât Bedahşân Hâtun bt. Abdullah meclis-i şer‘-i şerîf-i lâzımü’t-teşrîfde işbu hâmilü’l-kitâb İbrahim Beşe b. Mehmed nâm bostânî muvâcehesinde bi tav‘ihâ ikrâr ve i‘tirâf edip silk-i mülk-i sahîhimde münselik olup karye-i mezbûrede vâki‘ bir tarafdan Ahmed Çelebi b. Mehmed nâm kimesne mülkü ve bir tarafdan İmâmzâde Mehmed Efendi mülkü ve bir tarafdan Mehmed Beşe b. Hasan nâm kimesne mülkü ve bir tarafdan tarîk-i âm ile mahdûd fevkānî ve tahtânî üç bâb odaları ve bir sofa ve iki ahırı ve bir fırını ve eşcâr-ı müsmire ve gayr-ı müsmire hadîkayı müştemil olup çiftlik ta‘bîr olunur mülk menzilimi ve içinde mevcûd on re’s kara sığırı ineği ve bir çift kara sığırı öküzü ve bir arabamı ve sâir âlât-ı zirâ‘atımı mezbûr İbrahim Beşe’ye safka-i vâhide ile yirmi bir bin cedîd akçeye bey‘-i bâtt-ı sahîh-i şer‘î ile bâtten bey‘ ve teslîm ol dahi vech-i mübeyyen üzre iştirâ ve tesellüm ve kabz ve kabûl eyledikden sonra semeni olan meblağ-ı mezbûr yirmi bir bin akçeyi mezbûr İbrahim Beşe yedinden bi’t-tamâm ve’l-kemâl ahz ü kabz eyledim ba‘de’l-yevm emlâk-i mezbûrede vechen mine’l-vücûhi’ş-şer‘iyye ve [sebeben mine’l-]esbâbi’l-mer‘iyye benim alâka ve medhalim yokdur mersûm İbrahim Beşe’nin mülk-i müşterâsıdır keyfemâ yeşâ ve yehtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin aşer min Zilhicceti’ş-şerîfe li sene hamsin ve sittîn ve elf. Şuhûdü’l-hâl: El-Hâc Mehmed Beşe b. Ömer el-Hammâmî, Attâr Muslu Beşe b. Hasan, Hüseyin Beşe b. Mahmud, Osman Bey b. Ahmed el-Cündî, Mehmed b. Bayram, Mustafa Beşe b. Ömer, Hasan Beşe b. Hasan, Mehmed Beşe b. Hasan, Halil Çelebi b. İbrahim, Ali Beşe b. Mustafa ve gayr