Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 207 Hüküm no: 222 Orijinal metin no: [44b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nâfile Hâtun bt. Aydın’ın mülk evini vakf ederek vakfiyesini düzenlettiği, vakfiyeye uygun hüccet talep ettiği Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de merhûm Hazret-i Emir Buhârî -âmelehümu’llâhü te‘âlâ bi lütfihi’l-cârî- mahallesinde sâkine fahrü’l-muhadderât Nâfile Hâtun bt. Aydın meclis-i şer‘-i şerîf-i lâzımü’t-tevkīrde zikri câ’î vakfa kıbel-i şer‘-i şerîfden mansûb mütevellî olan Ali Çelebi b. Himmet nâm kimesne muvâcehesinde ikrâr-ı tâm ve takrîr-i kelâm edip mahalle-i merkūmede vâki‘ bir tarafdan Himmet Beşe b. Mehmed mülkü ve iki tarafdan Nakşibendiye fukarâsına meşrûta olan vakıf menzil ve bir tarafdan tarîk-i âm ile mahdûd olup bir bâb fevkānî odayı ve bir ahırı ve bir su kuyusu ve kenîfi müştemil olan menzil mülk-i mahz-ı sarîhim olmağla bin kırk târihi gününde medîne-i mezkûrede hilâfete mütevellî olan İbrahim Efendi b. Mehmed huzûrunda vakf ve habs edip süknâsını evvelâ kendi nefsime ba‘dehâ li ebeveyn kız karındaşım Emine Hâtun’a ve evlâdına ve evlâd-ı evlâd-ı evlâdına ba‘dehüm merkūme Emine Hâtun’un zevci Mustafa Beşe b. Mehmed nâm kimesneye ve evlâd-ı evlâd-ı evlâdına ba‘de’l-inkırâz beher Cum‘a gecesi bir sûre-i Mülk tilâvet edip sevâbını rûhuma hibe ve ihdâ etmek üzre bir racül-i sâliha şart ve ta‘yîn ve vakfiye tahrîr ve terkīm ettirmişidim nazar olunup mûcebince hüccet-i şer‘iyye tahrîr olunmak murâdımdır deyû târih-i mezbûr ile müverraha ile ve müşârun-ileyh İbrahim Efendi imzâsıyla mümzâ ve hatmi ile mahtûm ve mazmûnu vâkıfe-i merkūmenin takrîr-i meşrûhuna muvâfık bulundukdan sonra vâkıfe-i merkūme zeyl-i kitâbda mastûretü’l-esâmî olan müslimîn ile huzûrunda bâlâda tahrîr olunduğu üzre vakfını ve şurûtunu bi tav‘ihâ ikrâr ve i‘tirâf ve her birini alâ ru’ûsi’l-işhâd işhâd eyledikde vâki‘ü’l-hâl mütevellî-i mezbûr Ali Çelebi talebiyle ketb olundu. Fi’l-yevmi’s-sâmin aşer min Zilhicceti’ş-şerîfe li sene hamsin ve sittîn ve elf. Şuhûdü’l-hâl: Muharrirü’l-vesîka Mustafa Efendi b. Hasan Efendi, Mehmed Çelebi b. Ömer el-Hammâmî, Abdurrahman Efend[i] b. Abdullah, el-Hâc Abdülkādir Efendi b. Osman, Mustafa Halîfe b. Habib, Ahmed Beşe b. Mahmud, Mehmed Efendi b. Ali, Mustafa Çelebi b. Mehmed, Abdullah Bey b. Abdullah el-Cündî, Mustafa Halîfe b. Mehmed