Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 208 Hüküm no: 223 Orijinal metin no: [44b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin b. Mustafa’nın mülk menzilinin vârislerince Ahmed Beşe’ye satıldığı Medîne-i Ebâ Eyyûb el-Ensârî -dâme fî rıdvâni’l-Bârî-’de Şah Sultan mahallesi sâkinlerinden olup mukaddemâ fevt olan Hüseyin [b.] Mustafa’nın sulbî kebîr oğulları ve hasran vârisleri Ali ve Mustafa nâm kimesneler meclis-i şer‘-i şerîf-i lâzımü’t-teşrîfde işbu râfi‘ü’l-kitâb Ahmed Beşe b. Sefer nâm kimesne muvâcehesinde bi’t-tav‘ her biri ikrâr ve i‘tirâf edip müteveffâ-yı mezbûrun muhallefâtından olup mahalle-i merkūmede vâki‘ bir tarafdan Ahmed Beşe b. Abdülbâkī mülkü ve bir tarafdan Havva Hâtun bt. Ahmed mülkü ve bir tarafdan Piyâle b. Abdullah mülkü ve bir tarafdan tarîk-i âm ile mahdûd olup bir bâb tahtânî odayı ve bir sofayı ve bir su kuyusunu ve havluyu ve kenîfi müştemil olan mülk-i mevrûs menzilimizi bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık merkūm Ahmed Beşe’ye tarafeynden îcâb ve kabûlü hâvî bey‘-i bâtt-ı sahîh-i şer‘î ile on iki bin cedîd akçeye bey‘ ve teslîm ol dahi minvâl-i mübeyyen üzre iştirâ ve tesellüm ve kabz ve kabûl eyledikden sonra [45a] semeni olan meblağ-ı mezbûr on iki bin akçeyi yedinden tamâmen ahz ü kabz eyledik ba‘de’l-yevm menzil-i mahdûd-ı mezkûrda vechen mine’l-vücûhi’ş-şer‘î bizim alâkamız yokdur keyfemâ yeşâ mutasarrıf olsun dediklerinde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin aşer min Zilhicceti’ş-şerîfe li sene hamsin ve sittîn ve elf. Şuhûdü’l-hâl: Mehmed Efendi el-Kadı, Mustafa Efendi b. Hasan, el-Hâc Mahmud b. Mustafa, Süleyman Bey b. Davud Paşa, Ahmed Efendi el-İmâm, İbrahim Bey b. Mehmed, Mahmud Beşe b. Hasan, Ali Beşe b. Mustafa, Mahmud Beşe b. Hasan