Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 209 Hüküm no: 224 Orijinal metin no: [45a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Beşe’nin oğullarının babalarından miras kalan muhtelif eşyalarını vasîlerinden teslim aldıkları Fi’l-asl vilâyet-i Anadolu’da Mihaliç kasabası sâkinlerinden olup medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de merhûm Hazret-i Emir Buhârî -kaddese sırrahu el-azîzü’l-Bârî- mahallesi sükkânından olduğu hâlde fevt olan Mustafa Beşe b. Mehmed nâm müteveffânın sulbî kebîr oğulları Yusuf ve Hüseyin ve Mehmed nâm kimesneler meclis-i şer‘-i şerîf-i lâzımü’t-teşrîfde bundan esbak kıbel-i şer‘-i şerîfden merkūmûn Yusuf ve Hüseyin ve Mehmed’in tesviye-i umûruna mansûb vasîleri olan hâmil-i hâze’l-kitâb Abdullah Efendi b. Abdullah nâm cündî mahzarında her biri bi’t-tav‘ ikrâr-ı tâm ve takrîr-i kelâm edip mezbûr Abdullah Efendi mukaddemâ vasiyy-i şer‘îmiz olmağla müteveffâ-yı merkūmun metrûkâtından silahıyla bir tüfek ve bir kürde ve bir sîm kılıç ve bir sîm hançer ve bir sîm kaplı bıçak ve bir sîm kaplı kara saplı hançer ve bir bakır sini ve bir tepsi ve bir leğen ve bir balta kabz etmekle vaz‘-ı yed etmişidi, el-hâletü hâzihî verâsetimiz hasebiyle eşyâ-i merkūmeyi vasiyy-i mezbûr Abdullah Efendi yedinden tamâmen ahz ü kabz eyledik ba‘de’l-yevm müteveffâ-i mezbûrun metrûkâtından vasiyy-i merkūm zimmetinde bir akçe ve habbe hakkımız bâkī kalmadı zimmetini ibrâ-i âm ve iskāt-ı tâmâm ile ibrâ ve iskāt eyledik min ba‘d da‘vâ ve nizâ‘ımız yokdur sudûr dahi ederse lede’l-hükkâmi’l-kirâm istimâ‘ olunmaya dediklerinde gıbbe’t-tasdîki’ş-şer‘iyyi’l-vicâhî mâ hüve’l-vâki‘ bi’t-taleb ketb olundu. Fi’l-yevmi’s-sâdis aşer min Zilhicceti’ş-şerîfe li sene hamsin ve sittîn ve elf. Şuhûdü’l-hâl: Mustafa Efendi b. Hasan el-Müderris, Sinan Efendi b. el-Hâc Derviş el-Kadı, Ali Efendi b. Himmet el-İmâm, Mehmed Efendi b. Nasuh el-Kadı, Ali Beşe b. Mustafa, Hüseyin Çelebi b. Ali, Bayram Sofu b. Mehmed, Abdi b. İskender ve gayr