Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 210 Hüküm no: 225 Orijinal metin no: [45a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Franko v. Komno’nun mülk menzilini Kiryazi v. Yani’ye sattığı Vilâyet-i Rumeli’nde Kerpiniş kazâsına tâbi‘ Nedestoyo? nâm karye sâkinlerinden Franko v. Komno nâm zimmî mahfil-i kazâda işbu râfi‘ü’s-sifr Kiryazi v. Yani nâm nasrânî muvâcehesinde ikrâr ve i‘tirâf edip karye-i mezbûrede vâki‘ bir tarafdan Rizo v. Polo nâm zimmî mülkü ve bir tarafdan tarîk-i âm ile ve iki tarafdan merkūm Kiryazi mülkü ile mahdûd olup bir bâb odayı ve zât-ı eşcâr-ı müsmire ve gayr-ı müsmireyi ve bir kıt‘a bostan yerini ve beş aded dut ağaçlarını ve üç [aded] ceviz ağaçlarını müştemil olan mülk menzilimi cümle tevâbi‘ ve levâhıkıyla mezbûr Kiryazi’ye tarafeynden îcâb ve kabûlü hâvî bey‘-i kat‘î ile bâtten on üç bin cedîd akçeye bey‘ edip ol dahi vech-i mübeyyen üzre iştirâ ve kabûl eyleyip semen-i mezbûr on üç bin akçeyi müşterî-i merkūm yedinden tamâmen ahz ü kabz eyledim ba‘de’l-yevm emlâk-i merkūmda benim alâka ve medhalim yokdur mahallinde ahz ü kabza ve zabt ve tasarrufa müşterî-i mezbûr Kiryazi’yi tarafımdan taslît eyledim ba‘de’l-kabz mülk-i müşterâsıdır keyfemâ yeşâ mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin aşer min Zilhicceti’ş-şerîfe li sene hamsin ve sittîn ve elf. Şuhûdü’l-hâl: Ali Beşe b. Mustafa, Hüseyin b. Ali, Bayram b. Mehmed, Yani v. Yorgi, Dimo v. Kiryazi, Dimo v. Yorgi, Andriye v. Dimo ve gayr