Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 210 Hüküm no: 226 Orijinal metin no: [45b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi’nin Mehmed Beşe’yi bıçakla yaralama davasında sulh oldukları Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de ( ) mahallesi sâkinlerinden Mehmed Beşe b. Nasuh nâm kimesnenin babası ve tarafından husûs-ı câ’i’z-zikri ikrâra vekîl olup hasm-ı şer‘î-i câhid mahzarında Hızır Beşe b. Haydar ve Yahya Çelebi b. Abdülbâkī nâm kimesneler şehâdetleriyle şer‘an vekâleti sâbite olan mezbûr Nasuh Beşe b. Mehmed nâm kimesne meclis-i şer‘-i şerîf-i lâzımü’t-teşrîfde işbu râfi‘ü’l-kitâb Mehmed Çelebi b. Yusuf nâm kimesne tarafından dahi husûs-ı câ’i’z-zikri tasdîke vekîl olup bimâ hüve nehcü’s-sübût şer‘an vekâleti sâbite olan Ali Bey b. Mustafa nâm cündî mahzarında bi’l-vekâle ikrâr-ı tâm ve takrîr-i kelâm edip bundan akdem mezbûr Mehmed Çelebi b. Yusuf bi gayr-ı hakkın müvekkil-i mezbûr oğlum Mehmed Beşe’yi bıçak ile koluna darb [edip] mecrûh eyledikde oğlum Mehmed Beşe dahi mûcebini merkūm Mehmed Çelebi b. Yusuf’dan da‘vâ ve taleb edip ol dahi münkir olmağla beynimizde münâza‘ât-ı kesîre cereyân etmişidi, el-hâletü hâzihî beynimize muslihûn-ı müslimûn tavassut edip husûs-ı mezbûrdan beni beş yüz akçe üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr beş yüz akçeyi merhem-bahâ olmak üzre yedinden tamâmen ahz ü kabz edip husûs-ı mezbûra müte‘allik cemî‘ de‘âvî ve mütâlebât ve eymân ve muhâsamâtdan müvekkil-i mezbûr Mehmed Çelebi b. Yusuf’un zimmetini ibrâ eyledim ba‘de’l-yevm da‘vâ ve nizâ‘ım yokdur sudûr dahi ederse lede’l-hükkâm makbûle olmasın dedi dedikde vekîl-i mezbûrun kelimât-ı mahkiyesini vekîl-i âhar Ali Bey bi’l-muvâcehe tasdîk etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâmin min Zilhicceti’ş-şerîfe li sene hamsin ve sittîn ve elf. Şuhûdü’l-hâl: Hüseyin Çelebi b. İskender, Ali Beşe b. Abdülbâkī, Mahmud Beşe b. Mustafa çukadâ[r], Mustafa Efendi el-Müderris