Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 211 Hüküm no: 228 Orijinal metin no: [45b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kürk bedelinden borcu dolayısıyla hapse atılan İbrâil metropolidinin alacaklılarıyla anlaşıp borcunu vadeye bağladığı Vilâyet-i Rumeli’nde İbrâil kasabası keferesi metrepolidi Meledyoz v. Yorgi nâm râhib meclis-i şer‘-i şerîf-i lâzımü’t-teşrîfde kürkçü tâ’ifesinden Yorgi v. Panayot ve Paragob v. Kiryazi nâm zimmîler muvâcehelerinde ikrâr-ı tâm ve bast-ı merâm kılıp mezbûrân zimmîlere mikdârı beynimizde ilm-i şer‘î [ile] ma‘lûm samur kürk bahâsından dokuz yüz kıt‘a riyâlî guruş deynim olup def‘aten edâya iktidârım olmamağla mezbûrân Yorgi ve [Pa]ragob meblağ-ı mezbûru bundan akdem benden taleb ve da‘vâ ve şer‘le beni mahrûse-i Galata’da vâki‘ sicn-i sultânîde [habs] ettirmişler idi, hâlen meblağ-ı mezbûr dokuz yüz guruş dört yüz elli kıt‘a guruş riyâlî üzerine benimle sulh olup bedel-i sulh-ı mezbûr dört yüz elli guruşun iki yüz elli guruşunu yedimden kabz bâkī iki yüz guruş-ı kebîri merkūmân zimmîler târih-i kitâbdan yüz [46a] seksen gün tamâmına değin te’cîl eylediklerinden sonra meblağ-ı mâ‘adâ dört yüz elli guruşdan zimmetimi ibrâ ve iskāt eylediler, hâlen zimmetimde ba‘de hulûli’l-ecel iki yüz kıt‘a riyâlî guruş lâzımü’l-kazâ ve vâcibü’l-edâ deynim vardır suâl olunup ikrârları tahrîr olunmak matlûbumdur dedikde gıbbe’s-suâl mezbûrân Yorgi ve Paragob cevâblarında fi’l-hakīka hâl-i kaziyye mezbûr râhibin takrîr-i meşrûhu üzre olmağla dokuz yüz guruş dört yüz elli guruş sulh ve mâ‘adâdan mezbûr râhibin zimmetini ibrâ ve iskāt eylediğim[iz]den sonra bedel-i sulh olan dört yüz elli merkūmü’l-vasf guruşun iki yüz elli guruşunu yedinden ahz ü kabz eyledik bâkī iki yüz guruş[u] vech-i mübeyyen üzre yüz seksen gün tamâmına değin te’cîl eyledik dediklerinde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb olundu. Fi’l-yevmi’t-tâsi‘ aşer min Zilhicceti’ş-şerîfe min şuhûri sene hamsin ve sittîn ve elf. Şuhûdü’l-hâl: El-Hâc Mahmud Beşe b. Mustafa, Receb Çavuş b. Abdülbâkī, Hüseyin Çelebi b. Hilmi, Mustafa Beşe b. Mehmed ve gayruhüm Manol, Yorgi, Yadep?, Yorgi, Dali v. Fanakoz