Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 212 Hüküm no: 229 Orijinal metin no: [46a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi ile Paragob’un sattıkları kürk bedelinden alacakları için haps edilen Meletyoz v. Yorgi ile sulh oldukları ve vade verdikleri Mahmiye-i İstanbul’da Mahmud Paşa mahallesi sâkinlerinden Yorgi v. Panayot ve şerîki Paragob v. Kiryazi nâm zimmîler meclis-i şer‘de vilâyet-i Rumeli’nde İbrâil kasabası keferesi metrepolidi hâmil-i hâze’s-sifr Meletyoz v. Yorgi nâm râhib muvâcehesinde her biri ikrâr ve takrîr-i kelâm edip merkūm râhib zimmetinde mikdârı beynimizde ilm-i şer‘î ile ma‘lûm yedimizden müşterâ ve makbûz samur kürk semeninden dokuz yüz kıt‘a riyâlî guruş hakkım[ız] olup mukaddemâ meblağ-ı mezbûru merkūm râhibden taleb ve da‘vâ ve şer‘le habs ettirmişidik, lâkin meblağ-ı mezbûru def‘aten edâya kādir olmamağla beynimizde münâza‘ât-ı kesîre vâki‘ olmuş idi, el-hâletü hâzihî beynimize muslihûn-ı müslimûn tavassut edip meblağ-ı mezbûr dokuz yüz guruşdan bizi an ikrâr dört yüz elli kıt‘a riyâlî guruş-ı kebîr üzerine inşâ’-i akd-i sulh eylediklerinde biz dahi sulh-ı mezbûru kabûl ve bedel-i sulh olan meblağ-ı mezbûrun iki yüz elli kıt‘a riyâlî guruşunu yedinden ahz eyleyip bedel-i bâkī iki yüz kıt‘a riyâlî guruşu târih-i kitâbdan yüz seksen gün tamâmına değin te’cîl eylediğimizden sonra meblağ-ı mâ‘adâ dört yüz [elli] guruşdan merkūm râhibin zimmetini ibrâ ve iskāt ba‘de’l-yevm bedel-i bâkī iki yüz guruşdan gayrı merkūm râhib zimmetinde vechen mine’l-vücûhi’ş-şer‘iyye da‘vâ ve nizâ‘ımız kalmadı min ba‘d mazmûn-ı hüccete muhâlif bizden bizzat ve bi’l-vekâle da‘vâ ve nizâ‘ımız zuhûr ederse lede’l-hükkâm mesmû‘a olmaya dediklerinde mukırrân-ı merkūmânın minvâl-i meşrûh üzre cârî ve sâdır olan cemî‘ ikrârlarını merkūm râhib bi’l-muvâcehe tasdîk etmeğin mâ hüve’l-vâki‘ bi’t-taleb ketb olundu. Fi’s-sâmin aşer min Zilhicceti’ş-şerîfe li sene hamsin ve sittîn ve elf. Şuhûdü’l-hâl: El-Hâc Mahmud b. Mustafa, Receb Çavuş b. Abdi, Hüseyin Beşe b. Ali, Ahmed Beşe b. Hüseyin, Manol v. Yorgi, Kiryazi v. Yorgi, Karâyî v. Fanakoz