Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 213 Hüküm no: 230 Orijinal metin no: [46a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Bey b. Hüseyin’in kaçan kölesi Siyavuş’un Ebûbekir Beşe’de bulunduğu ve kendisine teslimi Vilâyet-i Anadolu’da Bigadiç kasabası sâkinlerinden râfi‘-i hâze’l-kitâb Ahmed Bey b. Hüseyin nâm cündî meclis-i şer‘-i şerîf-i lâzımü’t-tevkīrde medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de İdris Köşkü demekle ma‘rûfe mesîre kurbunda vâki‘ Zeyneb Hâtun mahallesi sâkinlerinden olup Ebûbekir Beşe b. Hüseyin mahzarında üzerine da‘vâ ve takrîr-i kelâm edip işbu orta boylu elâ gözlü kumral çatık kaşlı Gürciyyü’l-asl Siyavuş b. Abdullah nâm gulâm abd-i memlûküm olup lâkin târih-i kitâbdan elli beş gün mukaddem mülkümden ibâk etmişidi, el-hâletü hâzihî mezbûr Ebîbekir yedinde buldum suâl olunup teslîmine tenbîh olunsun dedikde gıbbe’s-suâl merkūm Ebûbekir cevâbında gulâm-ı mezbûru gāib ani’l-meclis Mehmed nâm kimesne karındaşımdı[r] deyû bundan akdem bana teslîm etmişidi deyû ikrâr, lâkin gulâm-ı mezbû[r] müdde‘î-i merkūmun abd-i memlûkü olup vech-i muharrer üzre mülkünden ibâk eylediğini münkir olıcak müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden olup kasaba-i merkūme sâkinlerinden [46b] Mehmed Bey b. Abdülbâkī ve Ömer Bey b. İsâ ve Mehmed Bey b. Ebûbekir ve Bayram Efendi [b.] Ebûbekir nâm kimesneler li ecli’ş-şehâde meclis-i şer‘a hâzırûn olup fi’l-hakīka gulâm-ı mevsûf-ı mezbûr müdde‘î-i merkūm Ahmed Bey’in mülkü olup târih-i kitâbdan elli beş gün mukaddem mülkünden minvâl-i mübeyyen üzre ibâk etmişid[i] bu husûsa şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde şehâdetleri makbûle oldukdan sonra gulâm-ı mevsûf-ı merkūmu âhara bey‘ veya hibe veyâhud vücûh-ı şer‘iyyeden bir tarîkle mülkünden ihrâc eylemediğine müdde‘î-i mezbûr Ahmed Bey’e yemîn teklîf olundukda alâ vefki’l-mes’ûl yemîn billâhi’l-aliyyi’l-a‘lâ etmeğin mûcebiyle ba‘de’l-hükm mâ hüve’l-vâki‘ bi’t-taleb ketb olundu. Fi’l-yevmi’l-ışr[în] min Zilhicceti’ş-şerîfe li sene hamsin ve sittîn ve elf. Şuhûdü’l-hâl: Mustafa Efendi b. Hasan, Ahmed Efendi b. Mehmed, Bayram Efendi b. Ebûbekir, Mehmed Bey b. Abdullah