Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 214 Hüküm no: 231 Orijinal metin no: [46b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Miho’nun oğullarının mülk ev ile beş parça mülk bağlarını sattıkları, tarlalarının tasarrufunu da devrettikleri Vilâyet-i Rumeli’nde Premedi kazâsına tâbi‘ Radhova nâm karye ahâlîsinden Kirko ve Çeho veledey Miho ve Miho v. Çeko nâm zimmîler meclis-i şer‘-i şerîfde işbu sâhibü’l-vesîka Panko v. Kuli ve Kirko v. Panko ve Kiko v. Hıristo nâm zimmîler muvâcehesinde her biri bi’t-tav‘ ikrâr ve i‘tirâf edip ber vech-i iştirâk mülkümüz olup kazâ-i mezbûr tevâbi‘inden Postine nâm karyede vâki‘ bir tarafdan Çelo v. Kosta ve bir tarafdan mezbûr Kiko ve bir tarafdan Hıristo v. Kika nâm nasrânîler mülkleri ve bir tarafdan tarîk-i âm ile mahdûd bir bâb tahtânî odayı ve bir kileri ve bir kıt‘a hadîkayı müştemil mülk menzil ile her birinin hudûdu beynimizde ma‘lûm beş kıt‘a mülk bağlarımızı ve adedi beynimizde ma‘lûm dut ve ceviz eşcârımızı dahi mezbûrûn zimmîlere bi safkatin vâhidetin dokuz bin akçeye bey‘-i kat‘î ile bey‘ edip anlar dahi ale’ş-şeriketi’s-seviy minvâl-i muharrer üzre iştirâ ve kabûl eylediklerinden sonra yine mezbûr Postine karyesi sınırı dâhilinde mevâzi‘-i adîdede vâki‘ lede’l-ahâlî ve’l-cîrân ma‘lûmü’l-hudûd on kıt‘a tarlalarımızın hakk-ı tasarruflarını dahi sâhib-i arz ma‘rifetiyle merkūmûn Panko ve Kirko ve Kiko’ya iki bin akçe bedel mukābelesinde ferağ ve tefvîz anlar dahi vech-i muharrer üzre ale’l-iştirâk tefevvuz ve kabûl eylediklerinden sonra semen-i mezbûr ile bedel-i merkūm cem‘an on bir bin cedîd akçeyi yedlerinden tamâmen ahz ü kabz eylediğimizden sonra emlâk-i merkūme ile ol tarlaları mahallinde zabt ve tasarrufa merkūmûn zimmîleri taslît eyledim dediklerinde gıbbe’t-tasdîk mâ vaka‘a bi’t-taleb ketb olundu. Fi’l-yevmi’t-tâsi‘ aşer min Zilhicceti’ş-şerîfe li sene hamsin ve sittîn ve elf. Şuhûdü’l-hâl: Ali Beşe b. Mustafa, Hüseyin Beşe b. Ali, Receb b. Mahmud, Peço v. Kulu, Mihal v. Daçka, Hıristo v. Duka, Manol v. Kiko ve gayr