Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 214 Hüküm no: 232 Orijinal metin no: [46b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Giro ve Lasko’nun tasarruflarındaki tarlanın tasarruf hakkını Leço v. Yani’ye devrettikleri Vilâyet-i Rumeli’nde Premedi kazâsına tâbi‘ Karabova nâm karyeden Giro ve Lasko v. Metro nâm zimmîler meclis-i şer‘-i şerîf-i lâzımü’t-tevkīrde Leço v. Yani nâm nasrânî muvâcehesinde her biri ikrâr ve i‘tirâf edip ber vech-i iştirâk tasarrufumuzda olup karye-i merkūmede vâki‘ bir tarafdan mersûm Leço ta[r]lası ve bir tarafdan Ketro v. Metri nâm zimmî tarlası ve bir tarafdan orman ve bir tarafdan pınar ile mahdûd olup tahmînen dört dönüm bir kıt‘a tarlamızın hakk-ı tasarrufunu mesfûr Leço’ya beş yüz cedîd akçe bedel mukābelesinde tefvîz bi’l-ferağ eylediğimizde ol dahi sâhib-i arz ma‘rifetiyle vech-i mübeyyen üzre tefevvuz ve kabûl eyleyip hakk-ı ferağ olan meblağ-ı mezbûr beş yüz cedîd akçeyi mersûm Leço yedinden tamâ[men] ahz ü kabz eylediğimden sonra ol tarlayı mahallinde zabt ve tasarrufa merkūm Leço’yu taslît eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb [ketb] olundu. Fi’l-yevmi’l-ışrîn min Zilhicceti’ş-şerîfe li sene hamsin ve sittîn ve elf. Şuhûdü’l-hâl: [48a] Ebûbekir Beşe b. Mehmed, Ali Beşe b. Mehmed, diğer Ali Beşe b. Mustafa, Mehmed Beşe b. Hasan, Fanoş v. Zedto, Bedyos v. Noş, Nikola v. Yani, Beho v. Nikola, Manol v. Yorgi