Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 215 Hüküm no: 233 Orijinal metin no: [47a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Bey b. Mahmud’un mülk menzilini Dilaver b. Abdullah’a sattığı Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Kiremitçi Süleyman Çelebi mahallesi sâkinlerinden fahrü’l-eşbâh Hasan Bey b. Mahmud nâm cündî meclis-i şer‘-i şerîf-i lâzımü’t-teşrîfde işbu râfi‘ü’l-vesîka mu‘takı Dilâver b. Abdullah nâm kimesne muvâcehesinde bi’t-tav‘ ve’r-rızâ ikrâr ve i‘tirâf edip mahmiye-i Galata tevâbi‘inden İstinye nâhiyesi muzâfâtından Telli demekle ma‘rûfe karyede vâki‘ bir tarafdan Sinan Beşe b. Mahmud mülkü ve bir tarafdan Mehmed Çelebi b. ( ) mülkü ve bir tarafdan yine benim mülküm ve bir tarafdan tarîk-i âm ile mahdûd olup eşcâr-ı müsmire ve gayr-ı müsmire hadîkayı müştemil olan mülk menzil arsayı bi cümleti’t-tevâbi‘ ve’l-[le]vâhık mezbûr Dilâver’e tarafeynden îcâb [ve] kabûl[ü] hâvî bey‘-i bâtt-ı sahîh-i şer‘î ile dört bin cedîd akçeye bey‘ ve teslîm ol dahi vech-i mübeyyen üzre iştirâ ve tesellüm ve kabz ve kabûl eyledikden sonra semeni olan meblağ-ı mezbûr dört bin akçeyi mezbûr [Di]lâver yedinden tamâ[men] ahz ü kabz eyledim ba‘de’l-yevm arsa-i merkūmede benim vechen mine’l-vücûh-ı şer‘iyye alâka ve medhalim yokdur mersûm Dilâver’in mülk-i müşterâsıdı[r] keyfemâ yeşâ ve hasbemâ yehtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-ışrîn min Zilhicceti’ş-şerîfe li sene hamsin ve sittîn ve elf. Şuhûdü’l-hâl: Mehmed Efendi b. Mihal?, Sinan Efendi b. el-Hâc Derviş, Mustafa Efendi b. Hasan, Ahmed Efendi b. Mehmed, Ali Beşe b. Mustafa, Hüseyin Beşe b. Ali, Bayram b. Mehmed, Abdi b. İskender