Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 215 Hüküm no: 234 Orijinal metin no: [47a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Bey’in babası Ali’nin azat ettiği câriyesinin vefatıyla terekesinden hissesini talep ettiği Vilâyet-i Anadolu’da Eflânî kazâsına tâbi‘ Mülâyim demekle ma‘rûf karye sâkinlerinden işbu râfi‘ü’l-kitâb Mustafa Bey b. Ali nâm kimesne meclis-i şer‘-i şerîfde bundan akdem vefât eden Şâkire bt. Abdullah nâm hâtunun cemî‘ metrûkâtına vâzı‘ü’l-yed idiği mütehakkık olan zevci Hasan Beşe b. Abdülbâkī nâm kimesne muvâcehesinde üzerine da‘vâ edip müteveffât-ı merkūme babam merhûm-ı mezbûrun mu‘takası olup hâlen verâseti bana ve zevci mezbûr Hasan Beşe’ye münhasıra iken mezbûr Hasan Beşe müteveffât-ı mersûmenin cümle metrûkâtına vaz‘-ı yed edip hisse-i şer‘iyyemi vermede te‘allül eder, suâl olunup hisse-i şer‘iyye-i ma‘lûmemi teslîme merkūm Hasan Beşe’ye tenbîh olunmak matlûbumdur dedikde gıbbe’s-suâl mezbûr Hasan Beşe cevâbında müteveffât-ı merkūmenin zevci olmak hasebiyle muhallefâtına vaz‘-ı yed eylediğin ikrâr lâkin müdde‘î-i mersûm müteveffât-ı merkūmenin mevlâsı mezbûr Ali Çavuş’un sulbî oğlu olduğunu münkir olıcak müdde‘î-i merkūmdan müdde‘âsını mübeyyine beyyine taleb olundukda udûl-i müslimînden olup karye-i mezbûre sâkinlerinden Kemal b. Mahmud ve Sefer b. İvaz nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffât-ı merkūme müdde‘î-i mezbûr Mustafa Bey’in babası merkūm Ali Çavuş’un câriye-i memlûkesi olduğu hâlde âzâd etmişidi, müteveffât-ı merkūme mezbûr Ali Çavuş’un mu‘takası olup ve müdde‘î-i mezbûr Mustafa Bey mersûm Ali Çavuş’un sulbî oğludur deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm bi’t-taleb ketb olundu. Fi’l-yevmi’s-sâlis ve’l-ışrîn min Zilhicceti’ş-şerîfe li sene hamsin ve sittîn ve elf. Şuhûdü’l-hâl: Abdullah Efendi b. Mehmed, Murad Beşe b. Mehmed, Hasan Beşe b. Ali, Mustafa Beşe b. Mehmed, Ali Beşe b. Mustafa ve gayr