Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 223 Hüküm no: 245 Orijinal metin no: [49a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdurrahman b. el-Hâc Kalender’in mülk menzilinin Ali Ağa b. Abdülbâki ile zevcesi Fağfur Hâtun bt. Abdülhâdi’ye satılması Husûs-ı câ’i’z-zikrin mahallinde ketb ü tahrîri iltimâs olunmağın kıbel-i şer‘-i şerîfden Surûrî Mustafa Efendi b. Hasan el-Müderris irsâl olunup ol dahi zeyl-i kitâbda mastûretü’l-esâmî müslimîn ile medîne-i Hazret-i Ebâ Eyyûb el-Ensârî -aleyhi rahmetü rabbihi’l-Bârî- mahallâtından Takyecibaşı mahallesi sâkinlerinden umdetü’l-müderrisîn İshak Efendi b. Veli’nin menziline varıp akd-i meclis-i şer‘-i şerîf eyledikde yine mahalle-i mezbûrede sâkin Abdurrahman b. el-Hâc Kalender nâm şâbb-ı emred ve meclis-i ma‘kūd-ı mezbûrda işbu bâ‘isü’l-vesîka Dergâh-ı âlî -dâme mahfûfen bi’l-me‘âlî müteferrikalar[ın]dan Ali Ağa b. Abdülbâkī ve zevceleri Fağfur Hâtun bt. Abdülhâdi muvâcehelerinde ikrâr ve i‘tirâf edip mahalle-i mezbûrede vâki‘ bir tarafdan fahrü’l-kuzât Abdullah Efendi b. eş-Şeyh Hasan mülkü ve bir tarafdan ba‘zan Seydi Beşe ve ba‘zan Suyolcu Ahmed Çelebi ve ba‘zan Sâime Hâtun mü[l]kleri ve bir tarafdan Mustafa Bey b. Abdülmennân mülkü ve bir tarafdan tarîk-i âm ile mahdûd olup üç bâb fevkānî ve iki bâb tahtânî odaları ve sofayı ve müşterek bi’r-i mâ’ı ve eşcâr-ı müsmire ve gayr-ı müsmire bahçeyi müştemil olup irsen ve şirâ’en mülküm olan menzilimi cümle tevâbi‘ ve levâhıkı ile mezbûrân Ali Ağa ve Fağfur Hâtun’a tarafeynden îcâb ve kabûlü hâvî bey‘-i bâtt-ı sahîh-i şer‘î ile fıddî ve nakd-i râyic fi’l-vakt elli altı bin cedîd akçeye bâtten bey‘ ve teslîm, anlar dahi ber vech-i iştirâk[’is-]seviy minvâl-i mübeyyen üzre iştirâ ve tesellüm ve kabz ve kabûl eylediklerinden sonra [49b] semen-i mezbûr elli altı bin akçeyi merkūmân yedlerinden tamâmen ahz ü kabz eyledim ba‘de’l-yevm menzil-i mahdûd-ı mezkûrda vechen mine’l-vücûh benim alâka ve medhalim yokdur, merkūmân Ali Ağa ve zevcesi Fağfur Hâtun’un mülk-i müşterâları olmuşdur, her biri keyfemâ yeşâ mutasarrıf olsun dedikde gıbbe’t-tasdîki’ş-şer‘iyyi’l-vicâhî husûs-ı mezbûru Mevlânâ-yı mezbûr mahallinde ketb ü tahrîr ba‘dehû meclis-i şer‘de alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fî gurreti Muharremi’l-harâm li sene sittîn ve sittîn ve elf. Şuhûdü’l-hâl: Umdetü’l-e’imme İshak Efendi b. Veli, Mehmed Çelebi b. Abdülaziz el-Müezzin, el-Hâc Halil b. Mirza, Ahmed Çelebi b. Mehmed el-Cündî, Mehmed Beşe b. Abdi, Mehmed Çelebi b. Veli, fahrü’l-kuzât Hasan Efendi b. Şeyh Mehmed Efendi, Mustafa Halîfe b. Musa kāimmakām-ı müezzin, Ahmed Çelebi b. Ali mestci, Mustafa Bey b. Abdi el-Cündî