Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 224 Hüküm no: 246 Orijinal metin no: [49b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Halime Hâtun bt. Abdülfettah’ın mülk menzilinin Fağfur Hâtun bt. Abdülmennân’a satıldığı Medîne-i Ebâ Eyyûb el-Ensârî -dâme fî rıdvâni’l-Bârî-’de Ahmed Dede mahallesi sâkinelerinden umdetü’l-muhadderât Halime Hâtun bt. el-merhûm Abdülfettâh Efendi’nin zevci ve tarafından menzil-i câ’i’z-zikri bey‘a ve semenini kabza vekîli olup mezbûreyi ma‘rifet-i şer‘iyye ile ârifân olan Mustafa Çelebi b. Mehmed ve Rıdvan b. Abdullah şehâdetleriyle şer‘an vekâleti sâbite olan fahrü’l-eşbâh Ali Çelebi b. el-Hâc Mehmed nâm vekîl meclis-i şer‘-i şerîf-i lâzımü’t-teşrîfde işbu râfi‘atü’l-kitâb Fağfur Hâtun bt. Abdülmennân’ın sadrî kebîr oğlu ve tarafından şirâ-i âti’l-beyâna vekîli olup merkūmenin zâtı[nı] ma‘rifet-i şer‘iyye ile ârifân olan Ahmed Çelebi b. Osman ve İbrahim Ağa b. Ahmed şehâdetleriyle şer‘an vekâleti [sâbite] olan Süleyman Çelebi b. Sinan nâm vekîl muvâcehesinde bi’l-vekâle ikrâr ve i‘tirâf edip müvekkilem merkūme Halime Hâtun’un mülkü olup medîne-i mezbûrede Takyecibaşı mahallesinde vâki‘ bir tarafdan Nakkaşzâde Mehmed Efendi b. Ahmed mülkü ve bir tarafdan Mehmed b. Ali mülkü ve bir tarafdan tarîk-i âm ve bir tarafdan tarîk-i hâs ile mahdûd olup hâriciye ve dâhiliyede büyût-i müte‘addideyi ve bir su kuyusunu ve bir matbah ve tahtapûşu ve zât-ı eşcâr-ı müsmire ve gayr-ı müsmire hadîkayı ve kenîfi müştemil olan mülk menzilini vekâlet-i mahkiyem hasebiyle mezbûr Süleyman Çelebi’ye elli bin cedîd akçeye bey‘-i kat‘î ile bâtten bey‘ ve teslîm ol dahi vâlidesi mezbûre Fağfur Hâtun için vech-i mübeyyen üzre iştirâ ve tesellüm ve kabz ve kabûl eyledikden sonra semen-i mezbûr elli bin akçeyi vekîl-i mezbûr yedinden tamâmen ahz ü kabz eyledim, ba‘de’l-yevm menzil-i mahdûd-ı mezkûrda müvekkilem mezbûre Halime Hâtun’un vechen mine’l-vücûhi’ş-şer‘iyye ve sebeben mine’l-esbâbi’l-mer‘iyye alâka ve medhali yokdur, müvekkile-i mezbûre Fağfur Hâtun’un mülk-i müşterâsı olmuşdur keyfemâ yeşâ ve hasbemâ yehtâr mutasarrıfe olsun dedikde vekîl-i mezbûrun minvâl-i meşrûh üzre cârî ve sâdır olan cemî‘ ikrârını vekîl-i âhar mezbûr Süleyman Çelebi bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’r-râbi‘ mine’l-Muharremi’l-harâm min şuhûri sene sittîn ve sittîn ve elf. Şuhûdü’l-hâl: İshak Efendi b. Veli, Mehmed Çelebi b. Ahmed, Mustafa Çelebi b. Ömer, Ali Çelebi b. Mehmed, Mustafa Çelebi b. Mehmed, İbrahim b. Mustafa, Mehmed Beşe b. Veli, Mehmed Beşe b. Veli, Mehmed Beşe b. İbrahim, Hızır Beşe b. Hüseyin, Mehmed Çelebi b. Ahmed, Hasan b. Abdullah, Ali Beşe b. Mehmed, Hüseyin Beşe b. Ali ve gayruhüm