Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 225 Hüküm no: 247 Orijinal metin no: [49b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Subaşı Ali Bey b. İbrahim’in ölen İsteyan’ın Mustafa Beşe’deki parası ile eşyalarını talep ettiği, iddiasından daha az malı çıktığı Medîne-i Hazret-i Ebâ Eyyûb el-Ensârî’de bi’l-fi‘il Haslar subaşısı olan Ali Bey b. İbrahim nâm kimesne meclis-i şer‘de işbu râfi‘ü’l-kitâb Mustafa Beşe b. Abdullah nâm kimesne mahzarında üzerine da‘vâ ve takrîr-i kelâm edip mezbûr Mustafa Beşe’nin hizmetkârı olup bundan akdem hâlik olan İsteyan nâm zimmînin zâhirde vâris-i ma‘rûfu olmamağla metrûkâtı beytülmâle âid olmağın hâlik-i merkūmûn mezbûr Mustafa Beşe yedinde üç bin akçe ile bir mikdâr eşyâsı alâ tarîki’l-vedî‘a var imiş hâlen suâl olunup alıverilmesi murâdımdır dedikde gıbbe’s-suâl mezbûr Mustafa Beşe cevâbında fi’l-hakīka hâlik-i merkūmun iki yüz elli akçe hakkı ile bir aba dolama ve bir siyah şalvarı vardır deyû ikrâr, ziyâdeyi inkâr ile cevâb vermeğin müdde‘î mezbûr Ali Bey’den da‘vâsına mutâbık beyyine taleb olundukda ityân-ı beyyineden izhâr-ı acz edip istihlâf etmeğin fi’l-vâki‘ hâlik-i mersûmun meblağ-ı mezbûr iki yüz elli akçe ile dolama ve şalvardan ziyâde bir akçe ve bir şeyi bâkī kalmadığına mezbûr Mustafa Beşe’ye yemîn teklîf olundukda ol dahi alâ vefki’l-mes’ûl yemîn billâhi te‘âlâ etmeğin mûcebiyle mezbûr Subaşı Ali Bey bî-vech ta‘arruzdan men‘ birle mâ vaka‘a bi’t-taleb ketb olundu. [51a] Fi’l-yevmi’l-hâmis mine’l-Muharremi’l-harâm li sene sittîn ve sittîn ve elf. Şuhûdü’l-hâl: Ali Beşe b. Mustafa, Hüseyin Çelebi b. Ali, Dilâver Beşe b. Abdullah, Abdi Beşe b. İskender, Bayram Sofu b. Mehmed ve gayruhüm