Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 225 Hüküm no: 248 Orijinal metin no: [50a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Çelebi b. Abdünnebi’nin mülk menzilini vefat eden Âişe Hâtun’a vefatından beş yıl önce sattığı Medîne-i Hazret-i Ebâ Eyyûb el-Ensârî -âmelehu’llâhu te‘âlâ bi lütfihi’l-Bârî-de Takyecibaşı mahallesi sâkinlerinden Ahmed Çelebi b. Abdünnebi meclis-i şer‘-i şerîfde mahalle-i mezbûrede sâkine iken bundan akdem müteveffât olan Âişe Hâtun bt. Mustafa’nın verâseti sadrî kebîr oğlu Mehmed b. Ramazan ile sadriye kebîre kızı Fâtıma nâm hâtuna münhasıra olduğu şer‘an zâhir ve müte‘ayyin oldukdan sonra tasdîk-i âti’z-zikre kendi tarafından mezbûr Mehmed asîl ve kız karındaşı merkūme Fâtıma Hâtun cânibinden vekîl olmağla muvâcehesinde ikrâr ve i‘tirâf edip medîne-i mezbûrede Baba Haydar mahallesinde vâki‘ bir tarafdan Çukadâr Mustafa Beşe mülkü ve bir tarafdan Kâtib Yusuf Çelebi mülkü ve bir tarafdan Hamza Beşe mülkü ve bir tarafdan tarîk-i âm ile mahdûd fevkānî ve tahtânî iki bâb odaları ve bir su kuyusunu ve eşcâr-ı müsmire ve gayr-ı müsmire hadîkayı ve kenîfi müştemil olan mülk menzil bundan akdem benim mülk-i mahz-ı sarîhim iken müteveffâ-yı merkūmeye târih-i kitâbdan beş sene mukaddem on iki bin akçeye bey‘-i kat‘î ile bey‘ ve kabz-ı semen-i mezbûr ve teslîm-i mebî‘-i mahdûd etmişidim mezbûre dahi mutasarrıfe iken vefât etmekle menzil-i mahdûd-ı mezkûr merkūmân Mehmed ve Fâtıma Hâtun’a bi hasebi’l-irsi’ş-şer‘î intikāl eyledi, benim vechen mine’l-vücûh alâka ve medhalim yokdur dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb olundu. Fi’l-yevmi’l-hâmis mine’l-Muharremi’l-harâm min şuhûri sene sittîn ve sittîn ve elf min hicreti men lehü’l-izzu ve’ş-şeref. Şuhûdü’l-hâl: eş-Şeyh Abdullah Efendi b. Ali, Mehmed Efendi b. Bâli, Fazlı Beşe b. Ahmed, Mehmed Beşe b. Ebîbekir ve gayruhüm mine’l-hâzırîn