Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 226 Hüküm no: 249 Orijinal metin no: [50a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Melika bt. Mustafa’nın muhtelif eşya ve hayvanını oğlu Arslan b. Ramazan’a hibe ettiği Havâss-ı aliyye kazâsına tâbi‘ Topçular nâm karye sâkinelerinden Melika bt. Mustafa nâm Kıbtiyye meclis-i şer‘-i şerîf-i lâzımü’t-tevkīrde sadrî kebîr oğlu işbu râfi‘ü’l-vesîka Arslan b. Ramazan nâm Kıbtî muvâcehesinde bi tav‘ihâ ikrâr ve i‘tirâf edip silk-i mülk-i sahîhimde münselik olan emlâkimden bir çerge ve bir atlas kaftan ve bir tencere ve bir sahan ve bir çerge keçesi ile bir re’s doru bârgir ve bir re’s siyah eşeğimi oğlum mezbûr Arslan’a hibe-i sahîha-i şer‘iyye ile hibe ve teslîm ve temlîk eylediğimde ol dahi meclis-i hibede minvâl-i meşrûh üzre ittihâb ve tesellüm ve temellük ve kabz ve kabûl eyledikden sonra min ba‘d eşyâ-i merkūme ile bârgir ve eşekde vechen mine’l-vücûhi’ş-şer‘iyye ve sebeben mine’l-esbâbi’l-mer‘iyye alâkam ve medhalim kalmadı oğlum mezbûr Arslan’ın emlâk-i mevhûbesi olmuşdur keyfemâ yeşâ mutasarrıf olsun dedikde mukırra-i mezbûrenin ikrâr-ı meşrûhasını oğlu merkūm Arslan bi’l-muvâcehe tasdîk ve bi’l-müşâfehe tahkīk etmeğin mâ vaka‘a bi’l-ibtigā ketb olundu. Fi’l-yevmi’l-hâmis mine’l-Muharremi’l-harâm [li] sene sittîn ve sittîn ve elf. Şuhûdü’l-hâl: Mustafa Efendi b. Receb, Mehmed b. Hacı, Mestân b. Nazlı, Mehmed b. Kasım, Malkoç b. Mustafa, Kurd b. Şahbaz, Abdullah b. İskender