Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 226 Hüküm no: 250 Orijinal metin no: [50b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Beşe b. Abdullah’ın tasarrufundaki vakıf ev küçük olduğu için mütevelli izniyle yeniden yaptırdığı ve binânın keşfi ile mâliyetinin tahmîni Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de merhûm Baba Haydar mahallesi sâkinlerinden işbu râfi‘ü’l-kitâb Ali Beşe b. Abdullah nâm râcil meclis-i şer‘-i şerîfde ikrâr-ı tâm ve takrîr-i kelâm edip sâbıkan şeyhülislâm ve müftî-i vekāyi‘i’l-enâm Ebû Said Efendi hazretlerinin kethüdâları ve vakf-ı âti’l-beyâna bi’l-fi‘il mütevellî olan umdetü’l-emâcid ve’l-ekârim Hamza Ağa b. el-merhûm Eyüb nâm sâhibü’l-hayrât vakfından olup mahalle-i mezbûrede vâki‘ bir tarafdan Mosi v. ( ) nâm Ermeni tasarrufunda olan vakıf menzil ve iki tarafdan Danyal v. Armağan? ve Himmet Bey b. Abdülbâkī mülkü ve ba‘zan Asvader mülkü ve bir tarafdan tarîk-i âm ile mahdûd olup tabaka-i ulyâda üç bâb odaları ve bir bâb sofayı ve bir kenîfi ve tabaka-i vustâda bir bâb odayı ve hâriciye olmak üzre bir bâb fevkānî odayı ve kenîfi ve vakf-ı mezbûrun kadîmî bir bâb tahtânî odayı ve kenîfi ve bir su kuyusunu ve bir mikdâr bahçeyi ve kenîfi müştemil olan vakıf menzili icâre-i mu‘accele-i ma‘lûme ve beher ay on yedişer? akçe ücret-i müeccele ile taht-ı tasarrufumda olup lâkin menzil-i mezbûr ancak bir bâb tahtânî oda olup ziyâde zîk olmağla icâre-i mu‘acceleme mahsûb olmak üzre mütevellî-i müşârun-ileyh Hamza Ağa’nın ma‘rifetiyle ebniye ihdâs ve binâ etmişidim, hâlen cânib-i şer‘-i şerîfden üzerine varılıp vakf-ı mezbûrun nıkzı keşf ve müşâhede olundukdan sonra harc u sarf eylediğim meblağ tahmîn-i sahîh-i mer‘î [ile] tahmîn ve takvîm olunmak matlûbumdur dedikde kıbel-i şer‘-i şerîfden umdetü’l-müderrisîn Mevlânâ Mustafa Efendi b. Hasan irsâl olunup ol dahi hâssa mi‘mârlarından Üstâd el-Hâc Hasan b. Abdullah ve Mustafa Beşe b. Abdullah ve zeyl-i kitâbda mastûretü’l-esâmî olan müslimîn ile üzerine varıp akd-i meclis-i şer‘ olundukdan sonra mi‘mârân-ı merkūmân vakf-ı mezbûrun zikr olunan bir bâb tahtânî odanın sakfı ve dolma duvarları ve tahta tavanı ve sâde kapı ve pencerelerin nıkzı sekiz bin akçeye tahmîn olundukdan sonra mi‘mârân-ı merkūmân mütevellî-i müşârun-ileyh Hamza Ağa muvâcehesinde mesâha ve takvîm eylediklerinde tûlen on altı zirâ‘ arzan on dört zirâ‘ bi hesâb-ı satrancî iki yüz yirmi zirâ‘ ulyâda iki bâb oda ve bir matbah döşemelerinin beher zirâ‘ı kırkar akçeden sekiz bin dokuz yüz altmış ve tûlen ve arzan bi hesâb-ı satrancî iki yüz yirmi dört zirâ‘ tavanın beher zirâ‘ı kırkar akçeden sekiz bin dokuz yüz altmış akçe ve tûlen ve arzan bi hesâbi’l-mezbûr iki yüz seksen dokuz zirâ‘ cedîd sakfın beher zirâ‘ı kırkar akçeden on bir bin beş yüz altmış akçe ve tûlen ve kadden bi hesâb-ı satrancî üç yüz otuz üç zirâ‘ dolma duvarların beher zirâ‘ı kırkar akçeden on üç bin üç yüz yirmi cedîd akçe ve tabaka-i ulyâda iki mücedded münakkaş ocak üç bin cedîd akçe ve bir matbah ocağı bin beş yüz cedîd akçe ve tabaka-i ulyâda vâki‘ iki bâb odada iki mükellef musandara ber vech-i maktû‘ üç bin akçe ve üstü …? arabî dolab ber vech-i maktû‘ altı yüz akçe iki odada on iki …? yüzer akçeden bin iki yüz cedîd akçe ve üç mücedded cam telleriyle ber vech-i maktû‘ üç yüz cedîd akçe bir matbah kapısı iki yüz cedîd akçe ve bir matbah penceresi yüz akçe ve iki aded kemerli arabî kapı ber vech-i maktû‘ bin cedîd akçe ve dört aded demirli pencere beher dânesi üçer yüz akçeden bin iki yüz cedîd akçe ve sofada iki kıt‘a pencere ber vech-i tahmîn-i muhammen üç yüz cedîd akçe ve üç aded tırabzan beher dânesi yüzer akçeden üç yüz akçe ve dört aded kafes beher dânesi kezâlik yüzer akçeden dört yüz akçe ve üç aded dehliz direği ber vech-i maktû‘ iki yüz kırk akçe ve sofada vâki‘ çift? yüz akçe ve tûlen ve kadden bi hesâb-ı terbî‘î on beş zirâ‘ ve tûlen ve arzan bi hesâbi’l-mezbûr kırk zirâ‘ selâmlık dolma duvarının beher zirâ‘ı kırkar akçeden bin sekiz yüz kırk akçe ve tûlen ve arzan bi hesâb-ı terbî‘î yüz beş zirâ‘ sakfın beher zirâ‘ı kırkar akçeden dört bin iki yüz akçe ve tûlen ve arzan bi hesâb-ı satrancî yirmi dört zirâ‘ tavanın beher zirâ‘ı kezâlik kırkar akçeden dokuz yüz altmış akçe ve bir nerdübân dört yüz cedîd akçe ve bir musandara üç yüz cedîd akçe ve üç aded pencereler iki yüz kırk cedîd akçe ve bir kapı ve bir cam yüz altmış akçe ve bir kapı dahi elli akçe ve bir kenîf ber vech-i maktû‘ bin cedîd akçe ve tûlen ve arzan bi hesâbi’s-satrancî elli bir zirâ‘ tahta perdenin beher zirâ‘ı onar akçeden beş yüz yirmi akçe ve kırk sekiz aded haydarî? tahtanın beher dânesi beşer akçeden iki yüz kırk cedîd akçe ve altmış sekiz aded İznikmid tahtasının beher dânesi onar akçeden altı yüz seksen akçe ve selâmlık kapısına muttasıl yirmi zirâ‘ taş duvarın beher zirâ‘ı ellişer akçeden bin cedîd akçe ve tahtânî bir kıt‘a kenîf bin akçe ve bir sokak kapısı ve bir attâr dükkânı ber vech-i maktû‘ iki bin cedîd akçe ve bir Bursa kapı dahi beş yüz akçe ve asma çardağı ve hadîka parmaklığı ber vech-i tahmîn-i muhammen iki bin beş yüz cedîd akçe ki cem‘an doksan dört bin yedi yüz cedîd akçeye bâliğ oldukda mi‘mârân-ı merkūmân ve sâir ehl-i vukūf bî-garaz müslimîn işbu mezbûr Ali Beşe’nin ihdâs eylediği ebniye-i merkūme ancak meblağ-ı mezbûr doksan dört bin yedi yüz cedîd akçeye olur bundan noksan ve ekal ile olmaz deyû her biri müşârun-ileyh Hamza Ağa muvâcehesinde tahmîn-i sahîh-i şer‘î ile tahmîn ve takvîm-i sarîh-i mer‘î ile takvîm ve icmâ‘ ve ittifâk eylediklerin Mevlânâ-yı müşârun-ileyh mahallinde ketb ü tahrîr ba‘dehû meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min Zilhicceti’ş-şerîfe sene [10]65. Şuhûdü’l-hâl: Umdetü’l-kuzât Davud Efendi b. Ahmed, Mehmed Çelebi b. Yakub, Mustafa Çelebi b. Davud Efendi, Ahmed Çelebi b. Davud Efendi, Mehmed Çelebi b. Davud Efendi, Muslu Çelebi b. Şeyh Sunullah, Mehmed Çelebi b. eş-Şeyh Sunullah, Sinan Bey b. Abdullah, Şaban Ağa b. Eyüb, el-Hâc Kenan b. Abdullah, Mehmed Çelebi b. Abdi, Fazlı Bey b. Abdülbâkī, Himmet Bey b. Abdullah el-Bevvâb, el-Hâc Mahmud Beşe b. Mustafa, Mehmed Çelebi b. Abdi, Abdi Çelebi b. Fazlullah, Mehmed Halîfe b. Ali, Ali Beşe b. Mustafa, Abdi Beşe b. İskender ve gayruhüm mine’l-hâzırîn