Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 229 Hüküm no: 251 Orijinal metin no: [51a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hızır Ağa b. Emrullah’ın mülk menzili ile çiftliğini Rıdvan Ağa b. Abdullah’a bey‘ bi’l-vefâ ile sattığı Husûs-ı âti’z-zikri[n] mahallinde ketb ve terkīmi iltimâs olunmağın kıbel-i şer‘-i şerîfden Mevlânâ Mustafa Efendi b. Hasan irsâl olunup ol dahi zeyl-i kitâbda mastûretü’l-esâmî müslimîn ile medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de merhûm Çavuş Kasım mahallesi sâkinlerinden umdetü erbâbü’t-tahrîr ve’l-kalem Mustafa Efendi b. el-merhûm Derviş Çavuş nâm kimesnenin menziline varıp akd-i meclis-i şer‘î şerîf eyledikde mahmiye-i İstanbul’da Ördek Kasab mahallesi sâkinlerinden mefharü’l-ekârim ve’l-e‘âlî Hızır Ağa b. Emrullah nâm kimesne meclis-i ma‘kūd-ı mezkûrda işbu râfi‘ü’l-kitâbi’l-müstetâb umdetü’l-emâcid ve’l-ekârim Rıdvan Ağa b. Abdullah nâm kimesne muvâcehesinde bi’t-tav‘ ve’l-ihtiyâr ikrâr ve i‘tirâf edip silk-i mülk-i sahîhimde münselik olup zikr olunan Ördek Kasab mahallesinde vâki‘ bir tarafdan Boyacı Hasan Ağa mülkü ve bir tarafdan ba‘zan Halil Bey ve ba‘zan Mustafa Bey ve ba‘zan Şerhî Efendi mülkü ve ba‘zan mahalle-i mezbûre imâmına meşrûta olan vakıf menzil ve bir tarafdan Kurd Ağa zevcesi mülkü ve iki tarafdan tarîk-i âm ile mahdûd olan mülk menzilim ile Havâss-ı Kostantıniyye kazâsına tâbi‘ Çekmece-i kebîr nâhiyesine tâbi‘ Sart köyü demekle ma‘rûfe karyede vâki‘ bir tarafdan Hasan Paşazâde Mehmed Bey mülkü ve bir tarafdan Terzibaşızâde? mülkü ve bir tarafdan Çavuşzâde Mehmed Ağa mülkü ve bir tarafdan tarîk-i âm ile mahdûd olup çiftlik ta‘bîr olunur mülk menzilimi bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık müşârun-ileyh Rıdvan Ağa’ya târih-i kitâbdan üç yüz gün tamâmına dek dokuz yük otuz yedi bin cedîd akçeye bey‘ bi’l-vefâ vechi üzre bey‘ ve teslîm ol dahi minvâl-i meşrûh üzre iştirâ ve tesellüm ve kabûl eyledikden sonra semen-i mezkûr dokuz yük otuz yedi bin akçeyi müşârun-ileyh Rıdvan Ağa yedinden tamâmen ahz ü kabz eyledim eğer meblağ-ı mezbûr dokuz yük otuz yedi bin akçeyi ecel-i mezbûr hulûlünde müşârun-ileyh Rıdvan Ağa’ya teslîm etmezsem bey‘-i mezbûr bâtte münkalib olsun dedikde mukırr-ı mezbûrun minvâl-i muharrer üzre cârî ve sâdır olan ikrârını merkūm Rıdvan Ağa vicâhen ve şifâhen tasdîk eylediğini Mevlânâ-yı mezbûr mahallinde ketb ü tahrîr ba‘dehû meclis-i şerîfe gelip alâ vukū‘ihî inhâ etmeğin mâ hüve’l-vâki‘ bi’l-ibtigā ketb olundu. Fi’l-yevmi’l-âşir mine’l-Muharremi’l-harâm li sene sittîn ve sittîn ve elf. Şuhûdü’l-hâl: Ali Ağa b. İlyas Efendi, el-Hâc Süleyman b. Abdülbâkī, Mustafa Çelebi b. Ali, Sefer Beşe b. Ali, Zülfikar Bey b. Abdülmennân, Mehmed Efendi b. Yakub, Mustafa Efendi b. Hasan, Hüseyin Çelebi b. Ali, Mustafa Beşe b. Mehmed