Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 230 Hüküm no: 252 Orijinal metin no: [51a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emetullah Hâtun bt. Hasan’ın mülk menzilini Zühre Hâtun Vakfı’na bey‘ bi’l-istiğlâl yoluyla sattığı Medîne-i Ebâ Eyyûb el-Ensârî -dâme fî rıdvâni’l-Bârî- mahallâtından Zeyneb Hâtun mahallesi sâkinelerinden Emetullah Hâtun bt. Hasan meclis-i şer‘-i şerîf-i lâzımü’t-tevkīrde medîne-i mezbûrede vâki‘ merhûme Zühre Hâtun Vakfı’na hâlen mütevellî olan işbu hâmilü’l-kitâb Mustafa Çelebi b. Mehmed nâm kimesne mahzarında bi tav‘ihâ ikrâr ve takrîr-i kelâm edip emlâkimden olup mahalle-i mezbûrede vâki‘ bir tarafdan mekābir-i müslimîn ve bir tarafdan Dürrî Beşe mülkü ve iki tarafdan tarîk-i hâs ile mahdûd ve mümtâz mülk menzilimi cemî‘ tevâbi‘ ve levâhıkı ile mütevellî-i mezbûra üç bin cedîd akçeye bi tarîki’l-istiğlâl bey‘ edip kabz-ı semen ve teslîm-i mebî‘ eylediğimden sonra yine mütevellî-i mezkûr menzil-i mahdûd-ı merkūmu ba‘de’t-tahliyeti’ş-şer‘iyye târih-i kitâb şehri gurresinden üç sene tamâmına değin beher sene dörder yüz ellişer akçeden cem‘an bin üç yüz elli akçe ücret ile bana îcâr ve teslîm ben dahi vech-i meşrûh üzre istîcâr ve tesellüm ve kabûl eyledim dedikde gıbbe’t-tasdîki’ş-şer‘iyyi’l-vicâhî mâ vaka‘a bi’t-taleb ketb olundu. Fi’l-yevmi’l-âşir mine’l-Muharremi’l-harâm li sene sittîn ve sittîn ve elf. Şuhûdü’l-hâl: Bayram Halîfe b. ( ) el-Müezzin, Abdi Beşe b. İskender, Hüseyin Çelebi b. Ali, Dilâver Beşe b. Abdullah, Bayram Sofu b. Mehmed ve gayruhüm