Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 231 Hüküm no: 254 Orijinal metin no: [51b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Hasan’ın mülk menzilini Fâtıma bt. Mehmed’in vasîsi Mustafa Çelebi’ye bey‘ bi’l-istiğlâl yoluyla sattığı Medîne-i Hazret-i Ebâ Eyyûb el-Ensârî -dâme fî rıdvâni’l-Bârî- mahallâtından Evlice Baba mahallesi sâkinlerinden el-Hâc Hasan b. Yağmur nâm kimesne meclis-i şer‘-i şerîf-i lâzımü’t-tevkīrde Fâtıma bt. Mehmed nâm sagīrenin tesviye-i umûruna kıbel-i şer‘-i kavîmden mansûb vasî olan işbu hâmilü’l-kitâb Mustafa Çelebi b. Ali nâm kimesne mahzarında bi tav‘ihî ikrâr ve takrîr-i kelâm edip emlâkimden olup mahalle-i mezbûrede vâki‘ bir tarafdan Kasım mülkü ve bir tarafdan yine mahalle-i merkūmenin mescid-i şerîfi ve bir tarafdan tarîk-i âm ile mahdûd mülk menzilimi cümle tevâbi‘ ve levâhıkı ile vasiyy-i mezbûr Mustafa Çelebi’ye yirmi beş kıt‘a riyâlî guruş ve yirmi yedi zolata ile bin altı yüz elli akçe ki bi hesâb-ı hurda cem‘an beş bin akçeye bi tarîki’l-istiğlâl bey‘ edip kabz-ı semen ve teslîm-i mebî‘ eylediğimden sonra yine vasiyy-i mezkûr menzil-i mahdûd-ı merkūmu ba‘de’t-tahliyeti’ş-şer‘iyye târih-i kitâb şehri gurresinden üç sene tamâmına değin beher sene yedişer yüz ellişer akçeden cem‘an iki bin iki yüz elli akçe ücret ile bana îcâr ve teslîm ben dahi vech-i muharrer üzre istîcâr ve tesellüm ve kabz ve kabûl eyledim dedikde gıbbe’t-tasdîki’ş-şer‘iyyi’l-vicâhî mâ hüve’l-vâki‘ bi’l-ibtigā ketb olundu. Fi’l-yevmi’s-sânî aşer mine’l-Muharremi’l-harâm li sene sittîn ve sittîn ve elf. Şuhûdü’l-hâl: Ömer Çelebi b. Mehmed, Ahmed Çelebi b. Ali, Bayram Halîfe b. Abdurrahman, Ahmed Çelebi b. Murad, Mahmud b. Mehmed, Ali Çelebi b. Pîrî ve gayruhüm