Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 232 Hüküm no: 255 Orijinal metin no: [51b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Halil Bey b. İbrahim’in Halil Beşe b. Mustafa’daki alacağını talep ettiği, inkâr etmesi üzerine borcunun şahitlerle ispatlandığı Mahmiye-i İstanbul’da Muhtesib İskender mahallesi sükkânından işbu râfi‘ü’l-kitâb Halil Bey b. İbrahim nâm cündî meclis-i şer‘-i şerîf-i enver ve mahfil-i dîn-i münîf-i ezherde Havâss-ı aliyye kazâsına tâbi‘ Çekmece-i kübrâ nâhiyesi ihtivâsından Polahiye demekle ma‘rûfe karye sâkinlerinden diğer Halil Beşe b. Mustafa nâm kimesne muvâcehesinde üzerine da‘vâ ve takrîr-i kelâm edip mezbûr Halil Beşe zimmetinde yeşil kontoş ve duhân bahâsından bin yedi yüz altmış beş akçe hakkım olup hâlen taleb eylediğimde vermede ta‘allül eder suâl olunup teslîme tenbîh olunmak murâdımdır dedikde gıbbe’s-suâl mezbûr Halil Beşe cevâbında müdde‘î-i mezbûr Halil Bey’e zimmetimde ancak bin iki yüz akçe deynim vardır deyû ikrâr, mâ‘adâyı münkir olıcak müdde‘î-i mezbûr Halil Bey’den müdde‘âsını mübeyyine beyyine taleb olundukda udûl-i ricâlden [52a] olup mahmiye-i mezbûrede Akseki mahallesi sükkânından olup mahalle-i mezbûre mescidi imâmı olan Yusuf Efendi b. Abdurrahman ve Mehmed Çelebi b. Mahmud ve Mustafa Çelebi b. Mehmed nâm kimesneler li ecli’ş-şehâde meclis-i şer‘a hâzırûn olup istişhâd olunduklarında fi’l-hakīka mezbûr Halil Beşe müdde‘î-i mezbûr Halil Bey’e cihet-i deyn-i şer‘îden on altı kıt‘a riyâlî guruş-ı kebîr ile bin yüz elli cedîd akçe zimmetimde lâzımü’l-edâ ve vâcibü’l-kazâ deynim vardır deyû bizim huzûrumuzda mezbûr Halil Beşe bi tav‘ihî ikrâr ve bizi işhâd etmişidi biz bu husûsa minvâl-i meşrûh üzre şâhidleriz şehâdet dahi ederiz deyû her bir münkir-i mezbûr muvâcehesinde edâ-i şehâdet-i şer‘iyye eylediklerinde gıbbe ri‘âyeti şerâ’iti kabûlihâ şehâdetleri makbûle ve mesmû‘a olmağın mûcebiyle ba‘de’l-hükm mâ hüve’l-vâki‘ gıbbe’t-taleb ve’l-iltimâs ketb olundu. Fi’l-yevmi’l-hâdî aşer mine’l-Muharremi’l-harâm min şuhûri sene sittîn ve sittîn ve elf. Şuhûdü’l-hâl: El-Hâc Mahmud Beşe b. Mustafa el-Mübâşir, Receb Abdi Efendi b. Mehmed, Mustafa Beşe b. Mehmed, Ali Beşe b. Mustafa, Hüseyin Beşe b. Ali, Mustafa Beşe b. Mehmed, Abdi Beşe b. İskender, Dilâver b. Abdülmennân ve gayruhüm min[e’l-hâzırîn]