Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 232 Hüküm no: 256 Orijinal metin no: [52a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Bey ile Mahmud Beşe’nin Ebûbekir b. Ali’ye mülk menzillerini sattıkları ve tasarruflarındaki sekiz tarlanın tasarruf hakkını devrettikleri Vilâyet-i Rumeli’nde Arnavud Belgrad[ı] kazâsı nevâhîsinden Malagas nâhiyesine tâbi‘ Lalar nâm karye sâkinlerinden Hüseyin Bey ve Mahmud Beşe ibney Mehmed nâm kimesneler meclis-i şer‘-i şerîfde işbu râfi‘ü’l-kitâb Ebûbekir b. Ali nâm kimesne mahzarında her biri tav‘an ikrâr ve i‘tirâf edip silk-i mülk-i sahîhimde münselik olup karye-i mezbûrede vâki‘ bir tarafdan Mehmed Kethüdâ mülkü ve bir tarafdan Hüseyin mülkü ve bir tarafdan İbrahim mülkü ve bir tarafdan tarîk-i âm ile mahdûd bir bâb tahtânî odayı ve bir kıt‘a harman yerini ve bahçeyi ve bağı müştemil mülk menzilimizi cümle tevâbi‘iyle mezbûr Ebûbekir’e iki bin beş yüz cedîd akçeye tarafeynden îcâb ve kabûlü hâvî bey‘-i bâtt-ı kat‘î ile bey‘ edip ol dahi vech-i mübeyyen üzre iştirâ ve kabûl eyledikden sonra yine karye-i mezbûrede mevâzi‘-i müteferrikada vâki‘ her birinin hudûdu beynimizde ma‘lûm sekiz kıt‘a tarlalarımızın dahi hakk-ı tasarruflarını ma‘rifet-i sâhib-i arz ile mezbûr Ebûbekir’e bin beş yüz akçe bedel mukābelesinde tefvîz ve ferağ eylediğimizde ol dahi tefevvuz ve kabûl eyleyip semen-i mezbûr ile bedel-i mezkûr ki cem‘an dört bin akçeyi merkūm Ebûbekir yedinden tamâmen ahz eylediğimizden sonra zikr olunan menzil ve tarlaları mahallinde zabt ve tasarrufa mezbûr Ebûbekir’i tarafımızdan taslît eyledik dedikde gıbbe’t-tasdîki’ş-şer‘î mâ hüve’l-vâki‘ kayd şüd. Fi’l-yevmi’s-sâlis aşer mine’l-Muharremi’l-harâm li sene sittîn ve sittîn ve elf. Şuhûdü’l-hâl: Hüseyin b. Mehmed, Bayram b. Mehmed, Mahmud b. Hasan, Sinan b. Abdullah, Hüseyin b. Osman, Ahmed b. Mustafa ve gayr