Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 233 Hüküm no: 257 Orijinal metin no: [52a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âmile Hâtun bt. Hüseyin’in mülk menzilini Mahmud Çelebi b. Ali’ye sattığı Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Davud Ağa mahallesi sâkinelerinden Âmile Hâtun bt. Hüseyin meclis-i şerî’at-i şerîfede işbu râfi‘ü’l-kitâb Mahmud Çelebi b. Ali nâm kimesne mahzarında bi tav‘ihâ ikrâr ve i‘tirâf [edip] silk-i mülkümde münselik olup mahalle-i mezbûrede vâki‘ bir tarafdan Takyecibaşı Mescidi’nin imâmına meşrûta vakıf menzil ve bir tarafdan yine benim âhar mülküm ve bir tarafdan mezbûr Mahmud Çelebi mülkü ve bir tarafdan tarîk-i âm ile mahdûd bir bâb fevkānî ve bir bâb tahtânî odaları ve sofayı ve su kuyusunu ve bahçeyi müştemil mülk menzilimi bi cümleti’t-tevâbi‘ ve’l-levâhık mezbûr Mahmud Çelebi’ye yedi bin dört yüz cedîd akçeye tarafeynden îcâb ve kabûlü hâvî bey‘-i bâtt-ı kat‘î ile bey‘ ve teslîm ol dahi minvâl-i mübeyyen üzre iştirâ ve tesellüm ve kabz ve kabûl eyledikden sonra semeni olan yedi bin dört yüz akçeyi mezbûr Mahmud Çelebi yedinden tamâmen ahz ü kabz eyledim ba‘de’l-yevm menzil-i mezkûr-ı mahdûdda vechen mine’l-vücûhi’ş-şer‘iyye benim alâka ve medhalim kalmadı mezbûr Mahmud Çelebi’nin mülk-i müşterâsıdır keyfemâ yeşâ mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ ketb olundu. Fi’l-yevmi’s-sâlis aşer mine’l-Muharremi’l-harâm li sene sittîn ve sittîn ve elf. Şuhûdü’l-hâl: Mehmed Efendi b. Muharrem el-İmâm, Nasuh Halîfe b. Abdüsselâm, Kadri Beşe b. Yusuf, Durmuş b. Ebî Tâlib, Mehmed Çelebi b. Ali