Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 234 Hüküm no: 258 Orijinal metin no: [52b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Nikola v. Manol’un Mihal v. Yani’ye mülk menzildeki yarı hissesini sattığı, tasarrufundaki tarladaki yarı hisseyi devrettiği, bedellerini ödünç aldığı para ile takas ettikleri Vilâyet-i Rumeli’nde Me[z]istre kazâsına tâbi‘ Prastoz nâm karyeden olup hâlen İstanbul’da habbâz tâ’ifesinden [olan] Nikola v. Manol nâm zimmî meclis-i şerî’at-i şerîfe[de] işbu râfi‘ü’l-[ve]sîka Mihal v. Yani nâm zimmî muvâcehesinde bi tav‘ihî ikrâr ve i‘tirâf edip emlâkimden olup karye-i mezbûrede vâki‘ bir tarafdan Dimitri ve Delko? veledey Nikola nâm zimmîler mülkleri ve bir tarafdan Yani v. Kond Stavli? mülkü ve bir tarafdan cebel ve bir tarafdan tarîk-i âm ile mahdûd bir bâb tahtânî odayı ve bahçeyi müştemil mülk menzilinde? olan nısf hisse-i şer‘iyyemi mezbûr Mihal’e otuz bin cedîd akçeye tarafeynden îcâb ve kabûlü hâvî bey‘-i bâtt-ı kat‘î ile bey‘ ve teslîm edip ol dahi vech-i meşrûh üzre iştirâ ve tesellüm ve kabûl eyleyip yine karye-i mezbûre sınırı dâhilinde vâki‘ inde’l-ahâlî ma‘lûmü’l-hudûd iki kıt‘a tarlada olan nısf hisse-i şâyi‘amın dahi hakk-ı tasarruflarını ma‘rifet-i sâhib-i arz ile beş [bin] akçe mukābelesinde tefvîz ve ferağ eylediğimde ol dahi tefevvuz ve kabûl eyledikden sonra semen-i mezbûr ile bedel-i mezkûr ki cem‘an otuz beş bin akçeyi merkūm Mihal’e cihet-i deyn-i şer‘iyyeden deynim olan otuz beş [bin] akçe hakkıyla takas edip ol dahi mukāssa ve kabûl eyledikden sonra zikr olunan menzil ve tarlalarda olan nısf hisse-i şer‘iyye-i şâyi‘alarımı mahallinde zabt ve tasarrufa mersûm Mihal’i tarafımdan taslît eyledim dedikde gıbbe’t-tasdîki’ş-şer‘î mâ hüve’l-vâki‘ ketb olundu. Fi’l-yevmi’s-sâlis aşer mine’l-Muharremi’l-harâm li sene sittîn ve sittîn ve elf. Şuhûdü’l-hâl: Osman Çelebi b. Sefer Ağa, Mehmed Çelebi b. Mustafa, Hasan b. Mehmed, Ali Beşe b. Mustafa, Hüseyin? Beşe? b. Ali