Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 234 Hüküm no: 259 Orijinal metin no: [52b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ünzile bt. Mustafa’nın mülk menzil, bahçe ve ağaçlardaki beşte bir hissesini Mehmed Beşe b. Ömer’e sattığı Vilâyet-i Anadolu’da Kastamonu sancağında vâki‘ Ginolu kazâsına tâbi‘ Celal nâm karye sâkin[e]lerinden Ünzile bt. Mustafa nâm hâtun meclis-i şer‘-i şerîf-i enverde işbu râfi‘ü’l-kitâb Mehmed Beşe b. Ömer nâm kimesne mahzarında tav‘an ikrâr ve i‘tirâf edip emlâkimden olup karye-i mezbûrede vâki‘ bir tarafdan Süleyman Fakīh veresesi bahçesi ve bir tarafdan tarîk-i âm ve iki tarafdan mezbûr Mehmed Beşe’nin arpalık tarlası ile mahdûd bir bâb fevkānî oda ve bir sofayı ve altında ahırı ve bir kıt‘a anbarı müştemil mülk menzilde ve yine menzil-i mezbûr kurbunda vâki‘ Turp Bostanı demekle ma‘rûf bahçede ve mescid-i şerîf kurbunda vâki‘ bir kıt‘a mülk bahçe ile yine karye-i merkūme sınırı dâhilinde mevâzi‘-i müteferrikada vâki‘ her biri beynimizde ma‘lûm eşcâr-ı müsmirede olan beş sehimden bir sehim hisse-i şer‘iyye-i şâyi‘amı mezbûr Mehmed Beşe’ye bin cedîd akçeye bey‘-i kat‘î ile bey‘ edip ol dahi vech-i muharrer üzre iştirâ ve kabûl eyleyip semeni olan meblağ-ı mezkûru mezbûr Mehmed Beşe yedinden tamâmen ahz ü kabz eylediğimden sonra zikr olunan emlâkda olan bir sehim hisse-i mezbûremi mahallinde zabt ve tasarrufa mezbûr Mehmed Beşe’yi tarafımdan taslît eyledim dedikde gıbbe’t-tasdîki’ş-şer‘iyyi’l-vicâhî mâ vaka‘a bi’t-taleb ketb olundu. Fi’l-yevmi’s-sâlis aşer mine’l-Muharremi’l-harâm li sene sittîn ve sittîn? ve elf. Şuhûdü’l-hâl: Esad b. Şaban, Ali Beşe b. Şems, Mustafa Beşe b. Dursun, Hasan Beşe b. Mehmed, Hüseyin b. İshak ve gayr