Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 235 Hüküm no: 260 Orijinal metin no: [52b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmail Beşe’nin Bağcinâne bt. Abdullah’ı boşadığının tesbiti Medîne-i Hazret-i Ebâ Eyyûb el-Ensârî -âmelehu’llâhu te‘âlâ anhü’l-Bârî-de Ali Paşa mahallesi sâkinelerinden işbu râfi‘atü’l-vesîka Bağcinâne bt. Abdullah nâm hâtun meclis-i şer‘-i şerîf-i lâzımü’t-teşrîfde İsmail Beşe b. Receb nâm râcil mahzarında ikrâr-ı tâm ve takrîr-i kelâm edip mezbûr İsmail Beşe bundan esbak zevcim olup lâkin hüsn-i mu‘âşeretimiz olmamağla talâk-ı selâse ile beni tatlîk etmiş iken yine benimle izdivâc mu‘âmelesin murâd eder suâl olunup takrîri tahrîr olunmak matlûbumdur dedikde gıbbe’s-suâl mezbûr İsmail Beşe cevâbında fi’l-hakīka merkūme Bağcinâne Hâtun bundan akdem vech-i mübeyyen üzre zevcem olup lâkin [53a] mersûmenin zimmetimde mütekarrir olan üç bin akçe mehr-i müeccel ve nafaka-i iddet ve me’ûnet-i süknâsından fâriğa olup zevciyete müte‘allik da‘vâdan dahi zimmetimi ibrâ ve iskāt eyledikde ben dahi mezbûru vech-i muharrer üzre talâk-ı selâse ile tatlîk etmişidim deyû bi tav‘ihî ikrâr ve i‘tirâf edip mezbûr İsmail Beşe’nin vech-i meşrûh üzre cârî ve sâdır olan cemî‘ ikrârını merkūm Bağcinâne Hâtun bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâlis aşer mine’l-Muharremi’l-harâm li sene sittîn ve sittîn ve elf. Şuhûdü’l-hâl: Mehmed Efendi b. Abdullah el-İmâm, diğer Mehmed Efendi b. Murad, Derviş Çelebi b. Mustafa, Hasan Çelebi b. Mustafa, Ahmed Beşe b. Ali, Mustafa Çelebi b. Mehmed, Mehmed Beşe b. İbrahim, Receb Efendi b. Abdi, Mahmud Beşe b. Ahmed, Ali Beşe b. Mustafa, Hüseyin Beşe b. Ali, Abdi Beşe b. İskender