Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 240 Hüküm no: 267 Orijinal metin no: [54a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kino v. Andon’un mülk menzilinin Niko v. Todori’ye satılması Havâss-ı Kostantıniyye kazâsı ihtivâsından Büyük Çekmece nâhiyesine tâbi‘ Kalikratiya nâm karye sükkânından Kino v. Andon nâm nasrânî meclis-i şerî’at-i şerîfede işbu bâ‘isü’l-vesîka Niko v. Todori nâm zimmî muvâcehesinde bi tav‘ihî ikrâr ve i‘tirâf edip silk-i mülk-i sahîhimde münselik olup karye-i mezbûr[e]de vâki‘ bir tarafdan Yani v. Abacı nâm nasrânî mülkü ve bir tarafdan İstemartolos v. ( ) nâm nasrânî mülkü ve bir tarafdan Manol v. ( ) mülkü ve bir tarafdan ba‘zan Nikola nâm nasrânî mülkü ve ba‘zan tarîk-i âm ile mahdûd ve mümtâz olup bir fevkānî odası ve tahtında bir kıt‘a ahırı müştemil olan mülk menzilimi bi cümleti’t-tevâbi‘ ve’l-levâhık ve kâffeti’l-hukūk ve’l-merâfık mezbûr Niko’ya tarafe[y]nden îcâb ve kabûlü hâvî bey‘-i bâtt-ı sahîh-i şer‘î ile iki bin altı yüz cedîd akçeye bey‘ ve teslîm ol dahi vech-i mübeyyen üzre iştirâ ve tesellüm ve kabz ve kabûl eyledikden sonra semeni olan meblağ-ı mezbûr iki bin akçeyi merkūm Niko yedinden tamâmen ahz ü kabz eyledim ba‘de’l-yevm menzil-i mahdûd-ı mezkûrda benim vechen mine’l-vücûhi’ş-şer‘iyye ve sebeben mine’l-esbâbi’l-mer‘iyye alâka ve medhalim yokdur mersûm Niko’nun mülk-i müşterâsı olmuşdur keyfemâ yeşâ ve yehtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb olundu. Fi’l-yevmi’s-sâbi‘ aşer mine’l-Muharremi’l-harâm li sene sittîn ve sittîn ve elf. Şuhûdü’l-hâl: El-Hâc Mahmud b. Dilâver, Ebîbekir Beşe b. ( ) er-Râcil, Ömer Beşe b. Halil, Abdi Beşe b. İskender, Ali Beşe b. Mustafa, Kara Dimoy v. Papa, Andronik v. Opulos