Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 276 Hüküm no: 303 Orijinal metin no: [39a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe’nin Ahmed Paşa’ya verdiği ödüncün kefilince ödenmesi Mahmiye-i İstanbul’da Ağakapısı’nda terziler kârhânesinde terzibaşı olan Mehmed Beşe b. Mahmud nâm kimesne meclis-i şer‘-i şerîf-i lâzımü’t-teşrîfde diğer Mehmed Beşe b. Mustafa mahzarında üzerine da‘vâ ve takrîr-i kelâm edip sâbıkan Birecik sancağına mutasarrıf olan el-Hâc Ahmed Paşa zimmetinde cihet-i karz-ı şer‘îden yüz otuz beş kıt‘a esedî guruş hakkım olup meblağ-ı mezbûra merkūm Mehmed Beşe emr ü kabûlü hâviye kefâleti-i sahîha-i şer‘iyye ile kefîl olmuşidi, hâlâ suâl olunup kefâleti hasebiyle mezbûr Mehmed Beşe’den meblağ-ı mezbûr yüz otuz beş kıt‘a esedî guruşun alıverilmesi matlûbumdur dedikde, gıbbe’s-suâl mezbûr Mehmed Beşe cevâbında vech-i muharrer üzre müdde‘î-i mezbûrun merkūm el-Hâc Ahmed Paşa zimmetinde olan meblağ-ı mezbûr yüz otuz beş kıt‘a esedî guruşa emr-i kabûlü hâviye kefâlet-i sahîha-i şer‘iyye ile kefîl olmuşidim deyû bi tav‘ihî ikrâr ve i‘tirâf etmeğin ikrârı mûcebince meblağ-ı mezbûr yüz otuz beş esedî guruşu müdde‘î-i mezbûr Mehmed Beşe’ye edâ ve teslîme merkūm diğer Mehmed Beşe’ye tenbîh birle mâ vaka‘a bi’t-taleb ketb olundu. Fi’l-yevmi’s-sâbi‘ aşer min Cumâdelâhire li sene seb‘a ve seb‘în ve elf. Şuhûdü’l-hâl: Mehmed Beşe b. Abdullah el-Mübâşir, Ahmed Bey b. ( ) Kapı kethüdâsı, Mustafa Beşe b. ( ) er-Râcil, Receb Beşe er-Râcil, Ömer Çavuş, Abdi Çelebi b. Hasan ve gayruhüm.