Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 277 Hüküm no: 304 Orijinal metin no: [39a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe’nin Ahmed Paşa’dan alacak davasında sulh olduğu Mahmiye-i İstanbul’da dergâh-ı âlî yeniçerileri ağası kapısında vâki‘ terziler kârhânesinin terzibaşıları olan Mehmed Beşe b. Mahmud nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb diğer Mehmed Beşe b. Mustafa nâm kimesne mahzarında ikrâr ve takrîr-i kelâm edip vilâyet-i Anadolu’da sâbıkan Birecik sancağına mutasarrıf olan el-Hâc Ahmed Paşa zimmetinde cihet-i karz-ı şer‘îden yüz otuz beş esedî guruş hakkım olup meblağ-ı mezbûra merkūm diğer Mehmed Beşe tarafından emr u kabûlü hâviye kefâlet-i sahîha-i şer‘iyye ile kefîl bi’l-mâl olmağın meblağ-ı mezbûr merkūm diğer Mehmed Beşe’den taleb ve da‘vâ eylediğimde beynimizde münâza‘ât-ı kesîre vakı‘a olmuşidi el-hâletü hâzihî tavassut-ı muslihîn ile da‘vâ-yı mezbûreden beynimizde yetmiş esedî guruş üzerine mezbûr diğer Mehmed Beşe benimle inşâ-i akd-i sulh eyledikde ben dahi sulh-i mezbûru kabûl ve bedel-i sulh olan meblağ-ı mezbûr yetmiş esedî guruşu mezbûr diğer Mehmed Beşe yedinden tamâmen ahz ve kabz mâ‘adâ da‘vâsından kefîl-i mezbûr diğer Mehmed Beşe’nin zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde gıbbe’t-tasdîk mâ vaka‘a bi’t-taleb ketb olundu. Hurrire fi yevmi’s-sâmin aşer min Cumâdelâhire li sene seb‘a ve seb‘în ve elf. Şuhûdü’l-hâl: Mehmed Beşe el-Mübâşir, Süleyman Beşe b. Ramazan, Mahmud Odabaşı, Tophâneli Ahmed Çelebi, Receb Beşe Kapı kethüdâsı, Abdülbâkī Beşe Kapı kethüdâsı.