Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 244 Hüküm no: 270 Orijinal metin no: [55a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ârif Mehmed Efendi b. Mehmed’in mülk bahçe arsasını Abdürrahim Efendi’ye sattığı Vilâyet-i Anadolu’da Barla kasabası sâkinlerinden umdetü’l-kuzât Ârif Mehmed Efendi b. Mehmed nâm kimesne meclis-i şer‘-i şerîf-i lâzımü’t-tevkīrde işbu râfi‘-i sıhhât-nisâbın sâhibleri a‘lemü’l-ulemâ’i’l-izâm efdalü’l-fuzalâ’i’l-fihâm yenbû‘ü’l-fezâ’il metbû‘ü’l-efâzıl Abdürrahim Efendi b. el-merhûm Mehmed Efendi mahzarında ikrâr ve i‘tirâf edip kasaba-i mezbûr[e]de Bahçeler demekle ma‘rûfe mevzi‘de vâki‘ iki tarafdan müşârun-ileyh Abdürrahim Efendi hazretleri bahçesi ve bir tarafdan Kavaklı demekle ma‘rûf bahçe ve bir tarafdan tarîk-i âm ile mahdûd olup tahmînen iki dönüm bir kıt‘a mülk bahçe arsasını bi cümleti’t-tevâbi‘ ve’l-levâhık müşârun-ileyh Abdürrahim Efendi hazretlerine bey‘-i kat‘î ile bin cedîd akçe[ye] bâtten bey‘ edip anlar dahi minvâl-i mübeyyen üzre iştirâ ve kabûl ve semen-i mezbûr bin akçeyi yed-i şerîflerinden tamâmen ahz ü kabz ve kabûl eyledim dedikden sonra mebî‘-i mahdûd-ı mezkûru mahallinde zabt ve tasarrufa mûmâ-ileyh Abdürrahim Efendi hazretlerini taslît eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâmin aşer mine’l-Muharremi’l-harâm li sene sittîn ve sittîn ve elf. Şuhûdü’l-hâl: Muharrirü’l-hurûf Mustafa Efendi b. Hasan Efendi, es-Seyyid Cafer Efendi b. es-Seyyid Mehmed, Hasan Efendi el-Kadı, Ahmed Çelebi b. Mehmed Efendi, Mahmud Çelebi b. Mehmed Efendi, Mehmed Efendi b. Nasuh, el-Hâc Hüseyin b. Hasan, el-Hâc Yahya b. Mehmed Efendi