Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 249 Hüküm no: 276 Orijinal metin no: [56b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sefer Efendi b. Mahmud’un Nakşibendiye fukarâsı için vakfettiği evin Mehmed Efendi’ye tahsisi Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de merhûm Hazret-i Emir Buhârî mahallesinde vâki‘ bir tarafdan ba‘zan Osman Ağa tasarrufunda olan vakıf menzil ve ba‘zan Nâfile Hâtun Vakfı ve bir tarafdan ba‘zan Âişe Hâtun Vakfı ve ba‘zan umdetü’l-kuzâti’l-İslâm Mustafa Efendi b. Ömer mülkü ve bir tarafdan tarîk-i hâs ve bir tarafdan tarîk-i âm ile mahdûd olan menzili sâbıkan Şeyh Mahmud Nakşibendî zâviyesinde şeyh olan Sefer Efendi b. Mahmud nâm sâhibü’l-hayr vakf ve habs edip süknâsını evvelâ kendi nefsine ba‘dehû evlâdına ve evlâd-ı evlâd-ı evlâdına ba‘de’l-inkırâz evlâd-ı halîlesi fahrü’l-muhadderât Saliha nâm hâtuna ba‘dehüm Nakşibendiye [fu]karâsından meskene muhtâc müte’ehhil bir racül-i sâlihe ba‘de’l-işâ bir sûre-i mülk tilâvet [ve] sevâbını rûhuna hibe ve ihdâ etmek üzre şart ve ta‘yîn edip ber mûceb-i şart-ı vâkıf mutasarrıfe-i mezbûre Saliha Hâtun vefât edip meşrûtun lehüm olanlar munkarız olmağla süknâ-yı menzil-i mezbûr mahlûl olmağın sulehâdan olup Nakşibendiye [fu]karâsından meskene eşedd-i ihtiyâc ile muhtâc olan işbu bâ‘isü’l-kitâb Mehmed Efendi b. Hasan nâm kimesneye menzil-i mezbûr merkūme Saliha Hâtun mahlûlünden ber mûceb-i şart-ı vâkıf tevcîh olunup tasarrufu için bu vesîka bi tarîki’t-temessük ketb ve yedine def‘ olundu. Fi’l-yevmi’l-âşir mine’l-Muharremi’l-harâm min şuhûri sene sittîn ve sittîn ve elf. Şuhûdü’l-hâl: Şeyh Mehmed Efendi b. Ramazan, Mustafa Efendi b. Ömer el-Kadı, Mehmed Efendi b. Nasuh el-Kadı, Mustafa Çelebi b. Mehmed, Hüseyin Çelebi b. Ali, Mustafa Çelebi b. Abdülbâkī