Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 249 Hüküm no: 277 Orijinal metin no: [56b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kiremitçi Süleyman Evkâfı câbisi iken vefat eden Murad Dede’nin üzerinde vakıf akçesi kaldığı Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de merhûm Kiremitçi Süleyman evkāfına bi’l-fi‘il mütevellî olan râfi‘-i hâze’l-kitâb Mehmed Çelebi b. Ahmed el-Bevvâb-ı sultânî meclis-i şerîf-i lâzımü’t-tevkīrde evkāf-ı mezbûre câbisi olup bundan mukaddem vefât eden Murad Dede b. Abdülmennân nâm müteveffânın sulbî oğlu Ahmed nâm şâbb-ı emred muvâcehesinde üzerine da‘vâ ve takrîr-i kelâm edip mezbûr Murad Dede evkāf-ı mezbûrun câbisi olmağla evkāf-ı merkūm akārâtı mahsûlünden beş bin üç yüz akçe icâre kabz edip meblağ-ı mezbûru cânib-i evkāf-ı mersûmeye kable’l-edâ fevt olmağla zimmetinde kalmışidi, hâlen meblağ-ı mezbûru tevliyet-i mahkiyem hasebiyle muhallefât-ı vâfiyesinden taleb ederin suâl olunsun dedikde gıbbe’s-suâl merkūm Ahmed cevâbında fi’l-hakīka babam müteveffâ-yı merkūm evkāf-ı mezbûrun câbisi olmağla vech-i mübeyyen üzre beş bin üç yüz akçe icâre kabz ve kable’l-edâ fevt olmağla zimmetinde kalmışidi deyû ikrâr lâkin müteveffâ-yı mezbûrun ism-i mâl ıtlâk olunur muhallefâtından bir şeyine vaz‘-ı yed edip kabz eylemedim deyû münkir olıcak mütevellî-i mezbûr Mehmed Çelebi’den müdde‘âsını mübeyyine beyyine taleb olundukda ikāmet-i beyyineden izhâr-ı acz edip istihlâf etmeğin fi’l-vâki‘ merkūm Ahmed müteveffâ-yı mezbûrun ism-i mâl ıtlâk olunur muhallefâtı olmayıp ve metrûkâtından bir şeyine vaz‘-ı yed ve kabz etmediğine yemîn teklîf olundu[kda] merkūm Ahmed dahi alâ hasebi’l-mes’ûl yemîn billâhi te‘âlâ etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâlis mine’l-Muharremi’l-harâm li sene sittîn ve sittîn ve elf. Şuhûdü’l-hâl: Muharrirü’l-hurûf Mustafa Efendi b. Hasan el-Müderris, Mehmed Efendi b. Nasuh el-Kadı, Receb Efendi b. Abdi, Ali Beşe b. Mustafa, Mehmed Efendi b. Yusuf