Bab Mahkemesi 3 Numaralı Sicil (H. 1077 / M. 1666 - 1667) cilt: 17, sayfa: 278 Hüküm no: 305 Orijinal metin no: [39b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Bey b. Mehmed’in, Musli Çavuş b. Kemaleddin’e verdiği borca karşılık eşya aldığı Fi’l-asl vilâyet-i Anadolu’da Alaşehir kasabasından olup mahmiye-i İstanbul’da müsâfiren sâkin olan Hüseyin Bey b. Mehmed nâm kimesne meclis-i şer‘-i hatîr-i lâzımü’t-tevkīrde Musli Çavuş b. Kemaleddin mahzarında ikrâr ve takrîr-i kelâm edip beynimizde ma‘lûm bir husûsun temşiyyeti için yüz yetmiş sekiz aded Engürüs ve seksen yaldız altınım ile on beş esedî guruşumu târih-i kitâbdan on ay mukaddem medîne-i Tokat’da mezbûr Musli Çavuş’a bi tarîki’r-rüşve def‘ ve teslîm ol dahi yedimden ahz u kabz ve istihlâk ettikden sonra mezbûr Musli Çavuş vech-i muharrer üzre zimmetinde hakkım olan meblağ-ı mezbûrun seksen frengî altınının misli seksen frengî altınını ve zikr olunan yüz yetmiş sekiz Engürüs altınının kırk dört tamâm ve sekiz çekirdeği için kırk aded frengî altını bana edâ ve teslîm, ben dahi ahz ve istîfâ ettiğimden sonra beynimizde ma‘lûm on iki hazîneli bir çergene ve bir matbah çadırı ve bir sîm topuz ve biri siyah ve biri kır ve biri kula üç re’s katırını yirmi frengî ve yüz sekiz yaldız altını ile on beş esedî guruşa bana bey‘ ve teslîm ben dahi iştirâ ve tesellüm edip semenlerini deyn-i mezbûrdan bâkī yirmi frengî ve yüz sekiz yaldız altını ve on beş esedî guruşa takās ol dahi mukāssa eyledikden sonra husûs-ı mezbûra müte‘allika âmme-i de‘âvâdan mezbûr Musli Çavuş’un zimmetini ibrâ ve iskāt eyledim dedikde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min Cumâdelâhire li sene seb‘a ve seb‘în ve elf. Şuhûdü’l-hâl: Beyzâde Mehmed Ağa, Kara Hüseyin Ağa, Ali Çavuş el-Mübâşir, diğer Ali Çavuş, İbrahim Çavuş, Mehmed Çelebi b. Süleyman Bey, Receb b. Ali.