Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 251 Hüküm no: 279 Orijinal metin no: [57a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tanaş v. Yuvan’ın mülk menzilini Kirko v. Ander’e sattığı Havâss-ı aliyye kazâsı nevâhîsinden Terkos nâhiyesine tâbi‘ Orta Belgrad nâm karye sâkinlerinden Tanaş v. Yuvan nâm zimmî meclis-i şerî’at-i şerîfede işbu râfi‘ü’s-sifr Kirko v. Ander nâm zimmî muvâcehesinde bi tav‘ihî ikrâr ve i‘tirâf edip silk-i mülkümde muntazam olup karye-i mezbûrede vâki‘ bir tarafı Yorgi v. Komnoz mülkü ve bir tarafı Yani dülger mülkü ve bir tarafı Frenk tarla[sı] ve taraf-ı râbi‘i tarîk-i âm ile mahdûd bir bâb tahtânî odayı ve zât-ı eşcâr-ı müsmire ve gayr-ı müsmire hadîkayı müştemil mülk menzilimi cümle tevâbi‘ ve levâhıkıyla merkūm Kirko’ya iki bin fıddî nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i meşrûh üzre iştirâ ve tesellüm ve kabz ve kabûl eyledikden sonra semeni olan meblağ-ı mezbûr iki bin akçeyi mersûm Kirko yedinden tamâmen ahz ü kabz eyledim ba‘de’l-yevm menzil-i mezkûrda vechen mine’l-vücûh alâkam kalmadı mesfûr Kirko’nun mülk-i müşterâsıdır keyfemâ yeşâ ve hasbemâ yehtâr mutasarrıf olsun dedikde gıbbe’t-tasdîki’ş-şer‘iyyi’l-vicâhî mâ hüve’l-vâki‘ bi’t-taleb ketb olundu. Fi’s-sâmin ve’l-ışrîn mine’l-Muharremi’l-harâm li sene sittîn ve sittîn ve elf. Şuhûdü’l-hâl: El-Hâc İbrahim b. Sefer, Ali Beşe b. Mustafa, Hüseyin Çelebi b. Ali, Hızır Beşe b. Mustafa, Dilâver b. Abdullah